Connect with us

खेलकुद

पोखरामा शुक्रबारदेखि अन्तरविद्यालय छात्र-छात्रा व्याडमिन्टन प्रतियोगिता हुने

पोखरा न्युज –

कास्की जिल्ला व्याडमिन्टन संघको आयोजनामा शुक्रबारदेखि अन्तरविद्यालय छात्र-छात्रा व्याडमिन्टन प्रतियोगिता हुदैंछ ।

प्रतियोगिताको आवश्यक तयारी पुरा भएको छ । भदौ ९ देखि १२ गतेसम्म इन्द्रबहादुर गुरुङ स्मृति १६ औं अन्तर विद्यालयस्तरीय व्याडमिन्टन प्रतियोगितामा १६ विद्यालयका दुईसय ६० जना छात्र-छात्राले प्रतिस्पर्धा गर्ने छन् । सिनियर र जुनियर एवं डबल्स तर्फको तीन इभेण्टमा प्रतिस्पर्धा हुने संघका सल्लाहकार एवं प्रतियोगिताका संयोजक निरबहादुर थापाले जानकारी दिए ।

विद्यालयस्तरदेखि नै खेलाडी उत्पादन गर्ने लक्ष्यलाई आत्मसात गर्दै व्याडमिन्टन संघले वर्षेनी प्रतियोगिता आयोजना गर्दै आएको छ । खेलाडीको सहभागिताले व्याडमिन्टन खेलप्रति विद्यालय र विद्यार्थीको चासो बढ्दै गएको छ । यो वर्ष तीनसय विद्यार्थीले सहभागिता जनाउने विश्वास गरिएको छ ।

१६ औं सस्करणसम्म आईपुग्दा सबैभन्दा पनि टप्सले उपाधि उचालिसकेको छ । संघको तथ्यांक अनुसार टप्स आठपटक च्याम्पियन्स बनेको छ । प्रगति बोर्डिङ स्कुलले तीन पटक च्याम्पियन्स हुनेमा आफनो नाम लेखाएको छ । त्यसैगरी गण्डकी आवासिय उच्चमावि, ग्लोबल कलेजियट, माउण्ट एभरेष्ट, पोखरा एकेडेमीले पनि उपाधि जितेको इतिहास लेखेका छन् ।

पछिल्लो समय सैनिक आवासिय महाविद्यालय, सेन्ट फ्रान्सिस, कुमुदिनी होम्स, सिदार्थ बोर्डिङ लगायतका विद्यालयले च्याम्पियन्स विद्यालयलाई चुनौति दिदैं आएका छन् । प्रगतिका विधान अधिकारी अघिल्लो तीन संस्करणमा बेष्ट प्लेयर घोषित भएका थिए ।

प्रतियोगिताको लागि प्रगति बोर्डिङ स्कुल, गोर्खा बराह ज्वलर्स र पोखरा लेखनाथ महानगरपालिकाले मुख्य प्रायोजन गरेका छन् । त्यसैगरी टप्स उमावि, कुुमुदिनीहोम्स, सोल्टी वाटर, शिखर इन्सुरेन्स, पोखरा स्टिल फेब्रिकेशन एशोसियसन, हट एण्ड स्पाईस, ई. दिपक बरालले सहप्रायोजन गरेका छन् । त्यस्तैल अनिल मिश्र, शुशिल श्रेष्ठले आर्थिक सहयोाग दिएको संघले जनाएको छ । राष्ट्रिय खेलाडी भुगोल गुरुङ तथा विशाल खड्का, रविन गुरुङ र शुशिल पौडेलले साईकल पुरस्कार प्रायोजन गरेका छन् । विकास गुरुङले भिक्ट्री विनर स्ट्याण्ड, राजकुमार गुरुङले स्कोर बोर्ड, राजेश गुरुङले प्राथमिकता उपचार, राजकुमार घलेले खानेपानी, चित्रबहादुर गुरुङ(हाल हङकङ)ले नेट प्रायोजन गरेका छन् । संघले प्रतियोगिता सफल पार्न ११ सदस्यीय विभिन्न उपसमिति गठन गरेको छ । ३ लाख १५ हजार खर्च हुने अनुमान गरिएको छ ।

कास्की जिल्ला व्याडमिन्टन संघले अहिले भईरहेको इण्डोरहलको दुई वटा कोर्टमा प्रतियोगिता सञ्चालन गर्दैआएको छ । संघले चार कोर्टसहितको अन्तराष्ट्रियस्तरको व्याडमिन्टन इण्डोर हल निर्माण कार्य अगाडि बढाएको छ । राष्ट्रिय खेलकुद परिषदले हलको लागि ३० लाख रुपैयाँ विनियोजन गरेको छ । जुन विनियोजित रकमबाट पहिलो चरणको काम धमाधम भईरहेको छ । संघले आफना सदस्यहरुबाट पनि आर्थिक सहयोग जुटाएको छ ।

 

 

खेलकुद

आयोजक सहारा आहा ! रारा गोल्ड कपको उद्घाटन खेलबाटै बाहिरियो

डीएनबी, पोखरा न्युज – ९ माघ ।

गत बर्षको उपविजेता आयोजक सहारा क्लव १६ औं संस्करणको आहा ! रारा गोल्ड कपको उद्घाटन खेलबाटै बाहिरिएको छ।

पोखरा रंगशालाको फुटवल मैदानमा मंगलबार भएको उद्घाटन खेलमा सुदुर पश्चिमाञ्चल धनगढीको ११ स्पोर्टिङ क्लवसंग ३–० को गोल अन्तरले पराजित भएसंगै आयोजक सहारा क्लव पहिलो खेलबाटै बाहिरिएको हो। स्पोर्टिङ क्लवको जितमा धनबहादुर थापा, मनिराम चौधरी र राकेश हमालले एक÷एक गोलको योगदान दिए। खेलको २५ औं मिनेटमा स्पोर्टिङ क्लवका धनबहादुर थापाले आफ्नो टिमको लागि पहिलो गोल गरे। उनले डि एरिया नजिकबाट प्रहार गरेको वल गोल भएको थियो। खेलको ७८ औं मिनेटमा नरेन्द्र चौधरीले हानेको फ्रि–किक बललाई पेनाल्टी एरिया नजिकै रहेका मनिराम चौधरीले हेड गोल गरे। मनिरामको हेड क्लिक हुँदै गोल भएको थियो। खेलको २ मिनेटको ईञ्जुरी समयमा राकेश हमालले एक गोल गरे। हमालले देब्रे साइडबाट करिब ३५ यार्डबाट प्रहार गरेको वलले जाली चुमेको थियो।

खेलमा स्पोर्टिङका मनिराम चौधरी म्यान अफ दी म्याच घोषित भए। उनले ट्रफीको साथमा नगद ५ हजारसमेत पुरस्कार हात पारे।
आयोजक सहाराले पाएका आधा दर्जन भन्दा बढी असवरहरु खेर जादाँ गत बर्ष फाइनल पुगेको सहारा यस बर्षको आहा ! राराको पहिलो खेलबाटै बाहिरिनु प¥यो। सहाराका विजय श्रेष्ठ, भिशन गुरुङ, विनोद गुरुङका गोल गर्ने केही अवसरहरु खेर जादाँ सहाराले यस पटक पहिलो खेलबाटै यात्रा टुङ्ग्याउनु प¥यो। पहिलो हाफमा १–० ले पछि परेको सहाराले दोश्रो हाफमा खेलाडी परिवर्तन गरी खेलमा केही परिवर्तन गर्न खोजेपछि अन्ततः खेलाडीहरुले फिनिसिङ गर्न नसक्दा दोश्रो हाफमा अधिकांश वल सहाराको पक्षमा भएपनि स्पोर्टिङ क्लवसंग पराजित हुनुप¥यो।

खेलको ६३ औं मिनेटमा विजय श्रेष्ठले गोललाइन नजिकै पाएकोे वललाई सदुपयोग गर्न नसक्दा टनिैङ प्वाइन्ट गुमाए। सहाराका प्रशिक्षक किरण श्रेष्ठले प्रयास गर्दागर्दै आफूहरुसंग अनुभवी खेलाडीहरुको अभावमा हार बेहोर्नुपरेको बताए। ‘हामीले गोललाइन नजिकै पाएको वल पनि सदुपयोग हुन सकेन,’ प्रशिक्षक श्रेष्ठले भने, ‘यसपटक हामीले विदेशी खेलाडी खेलाउन नपाउँदा हार बेहोर्नुपरेको हो । हामीसंग यसपाली स्थानीय खेलाडीहरु नै बढी थिए।’ वर्क पर्मिट नभएका कारण ३ जना विदेशी खेलाडीहरु सहाराबाट यसपाली खेल्न बञ्चित रहे।’

स्पोर्टिङ क्लवका प्रशिक्षक सुरेस हमालले सहाराले फिनिसिङ गर्न नसक्दा आफ्ना खेलाडीहरुले फाइदा उठाउँदै जित हासिल गरेको बताए। ‘हामी र सहारा क्लबको गोल गर्ने अवसर दुबै तर्फ बराबरी थियो,’ प्रशिक्षक हमालले भने, ‘त्यसमा सहाराले पाएका केही अवसर खेर जादाँ हामीले पाएका अवसरमा  गोल हुनुले नै  हाम्रो जित सहज भएको हो।’ भोलि बुधबार धरान फुटवल क्लव र भारतको सिक्किम युनाईटेड क्लवबीच खेल हुनेछ ।

यसैबिच, माघ २० गतेसम्म सञ्चालन हुने उक्त प्रतियोगिताको उद्घाटन पोखरा लेखनाथ महानगरपालिकाका मेयर मानबहादुर जि.सी.ले गरेका हुन्। कार्यक्रममा बोल्दै जि.सी.ले पोखराको फुटवल विकासमा आहा ∕ रारा गोल्ड कपले धेरै सहयोग पु¥याएको उल्लेख गरे। आहा ∕ रारा गोल्ड कपको मुख्य प्रायोजक हिमश्री फुड्स प्रालिका निर्देशक प्रकाश केसीले पोखराको खेलकुदको लागि यस्ता खेल गतिविधिमा प्रा.लि.ले निरन्तर रुपमा सहयोग गर्दैै आएको बताए। सहारा क्लवका अध्यक्ष केशवबहादुर थापाको अध्यक्षतामा उद्घाटनसत्र सम्पन्न भएको थियो।

प्रतियोगितामा दुई विदेशीसहित १२ टिमको सहभागिता रहने क्लवका बरिष्ठ उपाध्यक्ष हरिराम गुरुङ (सुरज) ले बताए। प्रतियोगितमा विजेताले उपाधीसहित ७ लाख, एक हजार, उपविजेताले ३ लाख, ५१ हजार पाउनेछन्। ‘खेलकुदको विकासमा सहकार्य गर्रौ, पोखरालाई खेलकुद पर्यटन शहरको रुपमा स्थापित गरौं’ भन्ने उद्देश्यका साथ सहारा क्लबले सञ्चालन गर्दै आएको उक्त प्रतियोगिताबाट बचत रकम सहारा एकेडेमीमा रहेका वालकहरुको भरण पोषणमा खर्च गर्दै आएको महासचिव विश्वराज बरालले बताए। सहारा एकेडेमीमा हाल १६ जिल्लाका २८ जना वालकहरु रहेका छन्। यस बर्षको आहा ∕ रारा गोल्ड कप हेर्ने भाग्यशाली एक जना दर्शकलाई सहारा हङकङबाट स्कूटर प्रदान गरिनेछ।

पोखरा रंगशालाको फुटवल मैदान अन्तराष्ट्रियस्तरको निर्माणको लागि हाल ग्लोवल टेण्डर आव्हान भई पुरानो प्यारापिटको केही भाग भत्काइएको छ। पूर्वपट्टिको प्यारापिटमा दर्शक रहेका थिए भने पश्चिमपट्टिे दर्शक जान रोक लगाइएको छ। क्लवले यस पटक दुईस्थानमा एक हजार क्षमताको कृत्तिम प्यारापिट (स्काई फोल्डिङ) निर्माण गरेको छ। उक्त प्रतियोगिताको मुख्य प्रायोजक हिमश्री फुड्स प्रा.लि.को उत्पादन आहा तथा रारा तयारी चाउचाउ रहेको छ भने सहारा क्लव अष्ट्रेलिया दोश्रो पुरस्कार प्रायोजकको रुपमा रहेको छ।

प्रतियोगितामा विभिन्न पाँच विधामा उत्कृष्ट हुने पुरस्कार प्रायोजकमा पृथ्बीराजमार्ग बस सञ्चालक समिति रहेको छ।

पुरा पढ्नुहोस

खेलकुद

पोखरामा आजदेखि आहा ! रारा गोल्डकप फुटबल प्रतियोगिता

पोखरा न्युज, ०९ माघ –

पोखरा रंगशालामा आजदेखि १६ औं संस्करणको आहा ! रारा गोल्डकप फुटबल प्रतियोगिता शुरु हुँदैछ।

सहारा क्लव पोखराको आयोजना तथा हिमश्री फुड्स प्रा.लिद्धारा उत्पादित रारा तैयारी चाउचाउको मुख्य प्रायोजनमा २० गतेसम्म हुन गइरहेको १६ औं आहा रारा गोल्डकप फुटबल प्रतियोगिताको संपूर्ण तयारी पूरा भएको छ । प्रतियोगिताको संपूर्ण तयारी पूरा भएको क्लबका अध्यक्ष केशवबहादुर थापाले जानकारी दिएका छन्।

प्रतियोगिताको उद्घाटन खेल आयोजक सहारा र सुदुरपश्चिमाञ्चलको फुटबल टिमबीच हुनेछ। पोखरा लेखनाथ महानगरपालिका प्रमुख मानबहादुर जि.सी.ले प्रतियोगिताको उद्घाटन गर्ने कार्यक्रम छ।

प्रतियोगितामा दुई विदेशी सहित १२ टीमको सहभागिता रहने छ। दुई विदेशी टिममा युनाइटेड सिक्किम फुटवल क्लव भारत र उत्तर वरिन्धरा क्लव वंगलादेश छन्।

नेपाली टिमहरुमा तीन बिभागीय टिमहरु त्रिभुवन आर्मी, नेपाल प्रहरी र सशस्त्र प्रहरी बलको नेपाल एपीएफ लगायत मनाङ मस्र्याङ्दी, संकटा क्लव, झापा–११, धरान पूmटवल क्लव, सुदूरपश्चिम–११, थ्री–स्टार र आयोजक सहारा क्लव रहेका छन्।प्रतियोगिताको विजेताले रु.७ लाख १ हजार र उपबिजेताले रु.३ लाख ५१ हजार शिल्ड, मेडल र प्रमाणपत्र पाउनेछ।

खेलकूदको विकासमा सहकार्य गरौं, पोखरालाई खेलकूद पर्यटन शहरको रुपमा स्थापित गरौं’ भन्ने मूल नाराका साथ आयोजना गरिने सो प्रतियोगितामा सर्वोत्कृष्ट खेलाडी र टिकट काटेर प्रतियोगिता अवलोकन गर्नेमध्ये गोलाप्रथाबाट छनोट हुने एकजना दर्शकले एक-एक थान स्कूटर पाउनेछन्।

पुरा पढ्नुहोस

खेलकुद

पोखराको अर्मलाकोट बास्केटबल कोर्टलाई समुदायमा हस्तान्तरण

पोखरा, ०९ माघ –

पोखरा लेखनाथ महानगरपालिका वडा नं १६ स्थित अर्मलकोटमा नवनिर्मित बास्केटबल कोर्ट समुदायलाई हस्तान्तरण गरिएको छ। प्रमुख अतिथि राष्ट्रिय खेलकुद परिषदका उपाध्यक्ष तथा नेपाल बास्केटबल संघका अध्यक्ष टेण्डी लामा शेर्पाको प्रमुख आतिथ्यतामा बास्केटबल कोर्टको उद्घाटन भएपछि उक्त बास्केटबल कोर्ट समुदायलाई हस्तान्तरण गरिएको हो।

बास्केटबल कोर्टलाई उपाध्यक्ष शेर्पा र डव्लु ओ वान जितबहादुर गुरुङकी वयोवृद्ध ८९ वर्षिय आमा मुङ्गा गुरुङले बास्केटबल कोर्टको शंयुक्त रुपमा उद्घाटन गरेका थिए। उक्त कोर्ट निर्माणको प्रमुख लगानीकर्ता जितबहादुर गुरुङ र अर्मला युके भाइखलकका शेरा गुरुङले शंयुक्त रुपमा विद्यालय, क्लव र आमा समूहलाई हस्तान्तरण गरेका थिए।

समुन्द्री सतहभन्दा करिव १ हजार ५ सय उचाईमा अवस्थित अर्मलाकोट पोखराकै सुन्दर एवम् मनमोहक गुरुङ समुदायको बस्ती हो। अर्मलाकोर्टमा निर्मित उक्त बास्केटबल कोर्ट पोखरा लेखनाथ महानगरपालिकाको उच्चस्थानमा निर्माण गर्न अर्मला निवासी ब्रिटिश सेनाका सेवानिवृत्त डव्लु ओ वान जितबहादुर गुरुङको ठूलो योगदान रहेको छ।

२०७१ सालमा करिब ४ रोपनी जग्गामा फैलिएको उक्त बास्केटबल कोर्ट निर्माण गर्न जित बहादुरले ४ लाखमा जग्गा किनेर शुरु गरेका थिए। परापूर्व कालदेखि श्रीपञ्चमी मेलासमेत लाग्ने गरेको उक्त गाउँमा मनोरञ्जन गर्ने स्थानसमेत नहुँदा जितबहादुरले गाँउका समाजसेवीहरुसंग मिलेर यो कार्यको सुरु गरेको बास्केटबल संघका उपाध्यक्ष एवम् अर्मला निवासी जुमप्रसाद गुरुङले बताए। जुम गुरुङका परिवारले पनि उक्त स्थानमा रहेको १९ आना जग्गा खेल मैदानका लागि दान गरेका हुन्।

मैदान निर्माण गर्न अर्मला निवासी हाल युकेमा कार्यरतहरुले अर्मला भाइखलक संस्थाका माध्यमद्धारा करिव ३६ लाख रुपैयाँ पठाएको जुम गुरुङले बताए। जितबहादुरले मात्रै करिब १७ लाख रुपैयाँ मैदान र प्यारापिट निर्माणका लागि खर्च गरेका छन्। उनले आफ्नो बुवा टंकप्रसाद गुरुङको स्मृतिमा करिव ५ लाख ५० हजार खर्चेर प्यारापिटसमेत निर्माण गरिदिएका छन्।

गाउँका काजीखलक चेलीबेटी समाजसमेतले एक लाख प्रदान गरेका छन्। ‘उक्त जग्गा हामीले नजिकैको सिता आधारभूत विद्यालयको नाममा दिएका छौं,’ निर्माण समितिका अध्यक्षसमेत रहेका गुरुङले भने। जग्गासहित ५३ लाख ५० हजार संपूर्ण खर्च भएको गुरुङले बताए।

उक्त मैदानको हस्तान्तरण कार्यक्रममा पुगेका उपाध्यक्ष शेर्पाले अर्मलाका समुदायले विदेशमा बसेर भएपनि गाउँ सम्झेर खेलकुद बिकासमा गरेको लगानी महत्वपूर्ण रहेको बताए। उनले पोखराकै मनमोहक र रमणीयस्थानमा निर्माण गरिएको बास्केटबल कोर्टलाई थप विस्तारका लागि राष्ट्रिय खेलकुद परिषदले सहयोग गर्ने प्रतिवद्धता जनाए। कार्यक्रममा कोर्ट निर्माणमा सहयोग गर्ने दाताहरुलाई सम्मान गरिएको थियो।

कार्यक्रममा नेपाल ओलम्पिक कमिटीका सदस्य तेज गुरुङ, पोखरा लेखनाथ महानगरपालिका वडा नं १६ का अध्यक्ष जीवन आचार्य लगायतले बोलेका थिए। कार्यक्रम सिता आधारभूत विद्यालयका अध्यक्ष भुपालसिंह गुरुङको अध्यक्षतामा भएको थियो।

पुरा पढ्नुहोस
Advertisement

छापावाल सुन प्रतितोला५६०००/-
तेजाबी सुन प्रतितोला५५७००/-
चाँदी प्रति तोला७८५/-
Advertisement pokharanews ad
Advertisement

धेरै पढिएको