Pokhara News

पोखरामा फेवा नव वर्ष महोत्सव अन्तर्गत आयोजित पर्यटक दौडमा नेदरल्याण्डका विल प्रथम

पोखरा न्युज -३० चैत ।

पश्चिमाञ्चल होटल संघ पोखराको आयोजनामा लेकसाइडमा जारी १५ औं फेवा नव वर्ष महोत्सव अन्तर्गत शुक्रबार आयोजित पर्यटक दौड प्रतियोगितामा नेदरल्याण्डका विल प्रथम भएका छन् । कूल ८० जना सहभागी प्रतियोगितामा सोही देशका जोर्न भ्यान द्वितीय र बेलायतका टम वुड्स तृतीय भए ।

महिला तर्फको छुट्टै मुल्यांकनमा वेलायतकी फिलिपा प्रथम, सोही देशकी जेनेला द्वितीय र फ्रान्सकी एमिलि तृतीय भएका छन् । पोखराको हल्लनचोक नजिक सिप प्लाजा होटल अगाडि बाट सुरु भएको दौडका सहभागी तीन किलोमिटर दक्षिणको फिस्टेल गेटसम्म दौडिएका थिए ।

महोत्सवस्थल कोमागाने पार्कमा आयोजित समारोहमा विजेताहरुलाई पुरस्कार वितरण गरिएको थियो । पोखरा पर्यटन परिषद्का अध्यक्ष केदारनाथ शर्मा, आयोजक संघका अध्यक्ष विकल तुलाचन, निवर्तमान अध्यक्ष भरतराज पराजुली, महासचिव गणेशराज पहारी, संघका सल्लाहकार गोविन्दराज पहारी र बुद्ध एयर पोखराका स्टेशन म्यानेजर गौतम बराल लगायतले पुरस्कार प्रदान गरेका थिए ।

रन फर फन नाम दिइएको प्रतियोगितामा प्रथम हुनेका लागि पोखरा काठमाडौं उडान टिकट, मायाको चिनो र विजी बी क्याफेमा ककटेल डिनर पुरस्कारस्वरुप प्रदान गरियो । यसैगरी दोश्रो हुनेका लागि आधा घण्टाको प्याराग्लाइडिङ, मायाको चिनो र सोही क्याफेमा ककटेल डिनर प्रदान गरियो । तेश्रो हुनेले पोखराबाट काठमाडौं सम्म ग्रिनलाइन टुुर्सबाट डिलक्स बस टिकट, मायाको चिनो र सोही क्याफेमा ककटेल डिनर प्राप्त गरेका छन् । बुद्ध एयर, यति एयर, पोखरा प्याराग्लाइडिङ र ग्रिनलाइट टुर्सले पुरस्कार प्रायोजन गरेका थिए । यति ब्रुअरीको अर्ना वियर मुख्य प्रायोजक र नेपाल पर्यटन बोर्ड महोत्सवको प्रबर्द्धक  रहेका छन् ।

अन्य खबर

पोखरामा फेवा नव वर्ष महोत्सवमा आयोजित डुंगा दौड प्रतियोगितामा फेवा डुंगा व्यवसायी संगठन विजयी

नयाँ वर्षसँगै पोखरामा बढ्यो पर्यटकको चहलपहल

फेवा महोत्सव जारी, डुंगा दौडमा बाराही ए प्रथम

खुल्दैछ.......