पोखरामा फेवा महोत्सव जारी, डुंगा दौडमा बाराही घाट प्रथम

पोखरा-

चौधौं फेवा नव वर्ष महोत्सव अन्तर्गत दोश्रो दिन बुधबार पोखराको बसुन्धरा पार्कबाट सुरु भएको डुंगा दौड प्रतियोगितामा बाराही घाट समूह प्रथम भएको छ । कूल नौ समूहले भाग लिएको प्रतियोगितामा स्वीमिङ पुल घाट बी द्वितीय र स्वीमिङ पुल घाट तृतीय भएका छन् । एउटा डुंगामा एक समूहमा तीन जना रहने गरी आयोजना गरिएको प्रतियोगितामा बाराही घाट डी ले सान्त्वना स्थान हासिल गरेको छ ।

प्रतियोगितामा प्रथम हुनेले १५ हजार रुपैयाँ, द्वितीय हुनेले १० हजार रुपैयाँ र तृतीय हुनेले पाँच हजार रुपैयाँ समूहगत पुरस्कार पाए । सान्त्वना पुरस्कारबापत तीन हजार रुपैयाँ प्रदान गरिएको छ । फेवा ताल बचाउन सचेतना फैलाउने उद्धेश्यले प्रतियोगिता आयोजना गरिएको महोत्सवका खेलकूद संयोजक तिलक वहादुर अधिकारीले जानकारी दिए ।

संघका अध्यक्ष एवं महोत्सवका संयोजक विकल तुलाचनले रेफ्री खेम गुरुङलाई सिट्ठी प्रदान गरी प्रतियोगिताको आरम्भ गराएका थिए । अर्का रेफ्री कृष्ण गिरीले गुरुङलाई सघाएका थिए । प्रतियोगीहरु तीन किलोमिटर उत्तर ताल विचमा रहेको बाराही मन्दिर परिक्रमा गरी पुनः वसुन्धरा पार्क नै फर्किने नियम राखिएको थियो । प्रायोजक गोर्खा ब्रुअरीका सुमन रेग्मी, चक्र बोहोरा र विजय बजगाईले विजेतालाई प्रमाणपत्र तथापुरस्कार प्रदान गरेका थिए ।

पन्चे  बाजाका साथमा आयोजना गरिएको प्रतियोगितालाई सशस्त्र प्रहरी बलको उद्धार टोली, नारा तथा प्याडल नेपाल, नमस्ते हस्पिटलले सघाएका थिए भने नेपाल पर्यटन बोर्डले प्रबद्र्धन गरेको थियो । संघका प्रथम उपाध्यक्ष लक्ष्मण सुबेदीले आगन्तुक सबैलाई स्वागत गरेका थिए भने अध्यक्ष तुलाचनले कार्यक्रम समापन गरेका थिए ।

यसैविच कोमागाने पार्कमा आयोजित महोत्सव अन्तर्गत बुधबार नै कृष्ण देवकोटा, प्रकाश सपुत, राजन कार्की, रामजी पौडेल, टेक क्षत्री, हस्त केसी, ज्योती मगर, मञ्जु विक, इन्द्र गुरुङको दोहोरी गीत तथा एके ४७ र गडबडीका कलाकारको हाँस्य प्रहसन तथा छुट्टै एकल नृत्यको प्रस्तुतीलाई तालिकाले समेटेको थियो । कालिप्रसाद नामक ब्याण्डको प्रस्तुतीलाई पनि ३० गतेकै तालिकामा राखिएको संघका महासचिव गणेशराज पहारीले जानकारी दिए ।

सम्बन्धित न्यूज

Leave a Reply

Your email address will not be published. Required fields are marked *

Back to top button