Category Archives: समाज

बाढीपहिरोबाट हालसम्म ६६ जनाको मृत्यु

पोखरा न्युज –

गृह मन्त्रालयले अविरल वर्षाका कारण आएको बाढीपहिरो र डुबानका कारण हालसम्म ६६ जनाको मृत्यु भएको जनाएको छ ।

गृह मन्त्रालयका अनुसार बाढीपहिरोबाट २८ घाइते र ५३ जना बेपत्ता रहेका छन् । रौटहटमा नौ, सुनरसीमा आठ, मोरङमा छ, सिन्धुली र झापामा चार-चार, दाङ, बाँके, सर्लाही, मकवानपुर र सुर्खेतमा तीन-तीन, बर्दिया, बारा, पाँचथर, महोत्तरी, हुम्ला, बाग्लुङ र चितवनमा दुई-दुई तथा धनुषा, पाल्पा, इलाम र कपिलवस्तुमा एक-एक जनाको मृत्यु भएको मन्त्रालयले जनाएको छ । त्यसैगरी झापामा १४, रौटहटमा आठ, मोरङमा सात, सुनसरीमा छ, मकवानपुर र पाँचथरमा तीन-तीन, पर्सामा दुई तथा सप्तरी, सर्लाही, इलाम, धनुषा, बारा, सिन्धुली, धादिङ, नवलपरासी र बर्दिमा एक-एक जना बेपत्ता भएका छन् ।

विपद्का कारण हालसम्म एक हजार पाँच घरमा क्षति पुगेको गृहमन्त्रालयले जनाएको छ । बाढीपहिरो तथा डुबानमा परेका व्यक्तिको खोज,उद्धार र राहत वितरणका लागि केन्द्रमा गृह मन्त्रालय र प्रभावित जिल्लामा जिल्ला प्रशासन कार्यालयमा कमाण्ड पोस्ट स्थापना गरी प्रतिकार्यका लागि समन्वय भइरहेको गृह मन्त्रालयका प्रवक्ता रामकृष्ण सुवेदीले आज जारी गर्नुभएको विज्ञप्तिमा जनाइएको छ । राहत वितरणका लागि प्रभावित २१ जिल्लामा एक करोड ९८ लाख रकम निकासा गरिएको गृह मन्त्रालयले जनाएको छ । रासस

सौराहाका पर्यटकको उद्धार 

नारायणगढ मुग्लिन सडक पुनः अवरुद्ध

पोखरा न्युज –

नारायणगढ मुग्लिन सडकखण्डको पाँचकिलोमा गए राति पहिरो खसेपछि सो सडक अवरुद्ध बनेको छ ।

जिल्ला प्रहरी कार्यालय चितवनका प्रहरी उपरीक्षक दीपक थापाका अनुसार राति १० बजेबाट सो ठाउँमा पहिरो खसेको हो । रातको समयमा पहिरो पन्छाउन नसकेपछि अहिले बिहानबाट पहिरो पन्छाउन शुरु गरिएको छ ।

सो सडकमा शुक्रबार दिउँसो २ बजेपछि ठाउँ–ठाउँमा पहिरो खसेपछि अवरुद्ध बनेको सडक आइतबार साँझ ५ः१५ बजे पहिरो पन्छाएर यातायात आवागमन शुरु भएको थियो । दुई दिनदेखि सवारी जाममा रहेका साधन सडकबाहिर निस्कन नपाउँदै पुनः पहिरो खसेपछि यात्रुहरु अलपत्र परेका छन् ।

रासस

राष्ट्रिय विपद संकटकाल घोषणा गरिने – मन्त्री विश्वकर्मा

पोखरा न्युज –

वाणिज्य मन्त्री मीन विश्वकर्माले लगातारको वर्षाका कारण आएको बाढी पहिरोको व्यवस्थापनका लागि सरकारले राष्ट्रिय विपद संकटकाल घोषणा गर्ने बताउनुभएको छ ।

रफत् सञ्चार क्लबमा आज आयोजित साक्षात्कार कार्यक्रममा उहाँले सरकारले सोचेजसरी बाढीपहिरोलगायतको विपद् व्यवस्थापन गर्न नसकेकाले आज बस्ने मन्त्रिपरिषद् बैठकले देशमा राष्ट्रिय संकटकाल घोषणा गर्ने सम्भावना रहेका बताउनुभएको हो ।

यतिबेला विपद् व्यवस्थापन गर्न सरकारलाई ठूलै चुनौती आइपरेको बताउँदै उहाँले कोशी ब्यारेजका केही ढोका खुल्न सरकारले गरेको कूटनीतिक पहल सफल भएको बताउनुभयो । ब्यारेजका सबै ढोका खुल्दा भारतको विहार डुबानमा पर्ने र त्यसो नगर्दा नेपाल डुबानमा पर्ने अवस्था रहेकाले विपद्का बेला सोचेर मात्र काम गर्नुपर्नेमा सरकार सजग रहेको उहाँको भनाइ थियो ।

अहिलेको विपद्ले तेस्रो चरणको निर्वाचनलाई प्रभाव पार्न सक्ने भए पनि सरकार चुनौतीको सामना गर्दै निर्वाचन सम्पन्न गर्न प्रतिबद्ध रहेको उहाँले बताउनुभयो ।

मन्त्री विश्वकर्माले भन्नुभयो, “माघ ७ सम्म सम्पूर्ण निर्वाचन सम्पन्न नगरिए देशमा संवैधानिक संकटको अवस्था आउँछ, त्यसैले सरकारले हचुवाको भरमा संसद् र प्रदेशको निर्वाचन मिति घोषणा गर्दैन, निर्वाचन आयोगले निर्वाचन गर्न सक्ने अवस्थामा मात्र निर्वाचन मिति घोषणा गरिने छ ।”

दुवै निर्वाचन एकैपटक गर्न सरकारले निर्वाचन आयोगसँग गरेको परामर्शमा निर्वाचन आयोगले कुनै निर्णय नगर्दा अन्यौलता बढेकामा चिन्ता व्यक्त गर्नुभयो । संविधान संशोधनमा दुई तिहाइ बहुमत पु¥याउन नेपाली काँग्रेसले विपक्षी दलहरुसँग छलफल तीव्र्र पारेको उहाँको भनाइ थियो ।

प्रधानमन्त्रीको भारत भ्रमणले दुई देशबीच बिग्रिएको सम्बन्ध सुधार ल्याउने र व्यापार घाटाका बारे छलफल हुने बताउँदै उहाँले चीनका उपप्रधानमन्त्रीको टोलीले गर्ने नेपाल भ्रमण नेपाल र नेपालीको हिता अनुकूल हुने उहाँले दाबी गर्नुभयो । रासस

बाढी प्रभावित जिल्लामा स्वच्छ खानेपानीको व्यवस्था गर्न निर्देशन

पोखरा न्युज –

खानेपानी तथा सरसफाइ मन्त्री महेन्द्र यादवले बाढी प्रभावित जिल्लामा स्वच्छ खानेपानीको व्यवस्था गर्न मन्त्रालयका अधिकारीलाई निर्देशन दिनुभएको छ ।

मन्त्रालयमा आज आयोजित कार्यक्रममा मन्त्री यादवले मन्त्रालयअन्तर्गतका कार्यालयका अधिकारीलाई प्रभावित क्षेत्रमा स्थलगत रुपमै गएर खानेपानीको समस्या समाधान र राहतका लागि पहल गर्न पनि निर्देशन दिनुभयो ।

“बाढीको प्रकोपमा परेका पीडित खानेपानीका कारण अन्य रोगको पनि शिकार हुन सक्ने र सरुवा रोगको प्रकोप फैलन सक्ने भएकाले अगाडि नै सचेत हुनुपर्छ, प्रभावित क्षेत्रमा खानेपानी र सफाइको समस्या हुने भएकाले सचेत भएर लाग्नुपर्छ”, उहाँले भन्नुभयो ।

कार्यक्रममा खानेपानी तथा ढल निकास विभाग, नेपाल खानेपानी संस्थान, खानेपानी तथा सरसफाइ कोष विकास समितिलगायत कार्यालयका अधिकारीको उपस्थिति रहेको मन्त्री यादवका प्रेस संयोजक भूषण पोखरेलले जानकारी दिनुभयो ।

कार्यक्रममा मन्त्री यादवले दातृ संस्थाहरु अक्सफाम, युनिसेफ, वल्र्ड भिजन, नेपाल रेडक्रस सोसाइटी, केयर नेपाललगायतलाई बाढीले तराई÷मधेशलगायत जिल्लामा पानीको मुहान विच्छेद गरेकाले उपत्यकाबाटै ‘मिनरल वाटर’ वा पिउन योग्य पानी लगेर भए पनि वितरण गर्न आह्वान गर्नुभयो ।

स्वास्थ्य सुरक्षाका लागि ‘स्वास्थ्य किट’ वितरण गर्न पनि उहाँले संस्थाका प्रतिनिधिसँग अनुरोध गर्नुभयो । रासस

सत्ताइस घण्टापछि नारायणगढ–मुग्लिन सडक सञ्चालनमा

पोखरा न्युज –

अविरल वर्षापछि ठाउँठाउँमा पहिरो खसेर २७ घण्टादेखि अवरुद्ध नारायणगढ–मुग्लिन सडक आज साँझ ५ बजेबाट सञ्चालनमा आएको छ ।

नारायणगढ–मुग्लिन सडक आयोजनाका प्रमुख चन्द्रनारायण यादवका अनुसार सो सडकको मुग्लिन क्षेत्र, कालिखोला, चोर खोला, भालुखोला, सेतीदोभान र भोर्लेलगायत क्षेत्रमा खसेको पहिरो पन्छाएर सडक सञ्चालन गरिएको हो ।

शनिबार अपराह्न २ बजेबाट जारी वर्षासँगै ठाउँठाउँमा पहिरो खसेपछि सडक अवरुद्ध बनेको थियो ।

यस्तै पृथ्वी राजमार्गको मुग्लिन–नौबिसे सडक खण्डमा झरेको पहिरो पन्छाएपछि एकातर्फी सडक सञ्चालनमा आएको छ । डिभिजन सडक कार्यालय भरतपुरका प्रमुख धर्मेन्द्र झाका अनुसार दुईतर्फी सञ्चालन गर्न भने साँझसम्म सकिएको छैन ।

मध्याह्न १२ बजेदेखि एकतर्फी रुपमा यातायात सञ्चालन भए पनि अघिल्लो दिनदेखि रोकिएका सवारीसाधन चार वटासम्म लाइन बनेर बसेकाले आवातजावत गराउन निकै कठिन भएको छ । उहाँका अनुसार पहिरोका कारण बाटो नरोकिएको भए पनि सवारी जामका कारण सो सडकमा समस्या उत्पन्न भएको हो । रासस

रासस अध्यक्ष वाग्लेद्वारा पोखरा कार्यालयको निरीक्षण

पोखरा न्युज –

राष्ट्रिय समाचार समिति (रासस)का अध्यक्ष कुलचन्द्र वाग्लेले पोखरास्थित रासस पश्चिमाञ्चल क्षेत्रीय कार्यालयको आज निरीक्षण गर्नुभएको छ ।

निरीक्षणका क्रममा उहाँले निकट भविष्यमा नै पोखरास्थित जीर्ण कार्यालय भवन भत्काई नयाँ भवन निर्माणको तयारी गर्नुपर्ने सम्बन्धमा पोखरामा कार्यरत कर्मचारीसँग सुझाव लिनुभयो ।

नेपाल सरकारले पोखराको नयाँ कार्यालय भवन निर्माणका लागि यस आर्थिक वर्षमा रु एक करोड बजेट निकासा दिने भएको बताउँदै उहाँले भवन निर्माण गर्न सरकारले क्रमागत बजेट निकासा दिने विश्वासका साथ निर्माण कार्यलाई अघि बढाउने लक्ष्य राखिएको बताउनुभयो । रासस