Category Archives: समाज

धादिङमा अव्यवस्थित बालुवा प्रशोधन उद्योगले दुर्घटना बढाए

दुर्घटना कमी गर्नका लागि सामूहिक पहल आवश्यक भएकाले सबैले कुरा मात्र होइन दुर्घटनामा कमी ल्याउन काम गरेर देखाउने प्रतिबद्धतासहित बिहीबार धादिङको घाटबेँसीमा भएको सडक दुर्घटना न्यूनीकरणसम्बन्धी छलफल सकिएको छ ।

दुर्घटनामा कमी ल्याउनुपर्नेमा ठूला दुर्घटना भइरहेको अवस्थामा गजुरी गाउँपालिकाको आयोजना र नेपाल अटो मोबाइल्स एशोसिएशनको सहयोगमा सञ्चालित कार्यक्रममा जिल्लाका सरोकारवाला, राजमार्ग क्षेत्रको गाउँपालिका अध्यक्ष, उपाध्यक्ष, चितवन जिल्लाको इच्छाकामना गाउँपालिका अध्यक्ष उपाध्यक्षसहितले गाउँपालिकाले रणनीति बनाएर दुर्घटनामा कमी गर्न लागिपर्ने प्रतिबद्धता जनाएका हुन् ।

हालै निर्वाचित प्रतिनिधिसभा सदस्य भूमि त्रिपाठी, प्रदेशसभा सदस्य शालिकराम जमरकट्टेल, जिल्ला समन्वय समितिका प्रमुख जगन्नाथ नेपाल, प्रमुख जिल्ला अधिकारी श्याम भण्डारी, प्रहरी उपरीक्षक ध्रुवराज राउत, सबै सुरक्षा अंगका प्रमुख, राजमार्गमा पर्ने गाउँपालिकाका अध्यक्ष र उपाध्यक्षले स्थानीय सरकारले नै दीर्घकालीन नीति बनाएर राजमार्गको सुरक्षा र यात्रुको सुरक्षाका लागि काम गर्नुपर्नेमा जोड दिएका हुन् ।

२०२४ सालमा खनिएको सडक हाल सवारी चापका कारण धान्न नसक्ने अवस्थामा पुगेको, ठूला सवारीसाधनका कारण राजमार्ग भत्किरहेको र अव्यवस्थित बालुवा प्रशोधन उद्योगले सडकलाई क्षतविक्षत पारेकाले यस्तो कार्य तत्काल रोक्न स्थानीय तहको सरकारले गुरुयोजना बनाएर लागिपर्ने बेनीघाट रोराङ गाउँपालिकाका अध्यक्ष हरि डल्लाकोटीले बताए ।

हालका दिनमा सडक दुर्घटना मानिसको मृत्युको आठौँ कारण भएकाले आगामी २०३० सम्म पुग्दा तेस्रो कारण बन्न सक्ने भएकाले बेलैमा सबैको इच्छाशक्तिका कारण मात्र दुर्घटना कम गर्न सकिने भएकाले सबैको सामूहिक प्रयास आवश्यक रहेकाले आफूले समेत सहयोग पुरयाउने नेपाल अटोमोबाइल्स एशोसिएशनका अध्यक्ष गोविन्द भट्टराईले बताए ।

विगत २० वर्षको तथ्यांक हेर्ने हो भने ६२ हजार मानिस गम्भीर किसिमको अंगभंग भएर बसिरहेकाले पनि राजमार्ग र यात्रुको सुरक्षा योजनाअनुसार काम गर्नुपर्ने उनको धारणा थियो ।

धादिङको गजुरीबाट नागढुंगासम्मको क्षेत्रमा बालुवाका कारण राजमार्ग तहसनहस भएको, व्यावसायीले बालुवा निकालेर पानी चुहाउँदै लैजाने गर्नाले ७० जिल्लाका मानिस आवतजावत गर्ने राष्ट्रिय सम्पत्ति बिग्रिएकाले यसको स्तरोन्नति गर्न जरुरी भइसकेको ट्राफिक इञ्जिनियर आशिष गजुरेलले बताए ।

चितवनको इच्छाकामना गाउँपालिकासमेतको सहभागिता रहेको कार्यक्रममा गाउँपालिका र नगरपालिकाले हरेक गाउँपालिका क्षेत्रमा सुरक्षा अधिकारीसहितको रेस्क्यु सेन्टर राख्ने, त्यसलाई तालीमसहितको व्यवस्थापन गर्ने, सचेतनामूलक कार्यक्रम सञ्चालन गर्ने, ठूला सवारी र टिपरका कारण राजमार्ग बिग्रिएको र सडकमा झरेको बालुवाका कारण राजमार्ग तहसनहस भएकाले सो नियन्त्रण गर्ने, राष्ट्रिय राजमार्गको दायाँबायाँ क्षेत्र खाली गर्ने, बजारलगायतका स्थानमा पैदलमार्ग बनाउने, नजिकै रहेका घरटहरा हटाउन सुरक्षामाग गरी हटाउनेलगायतका प्रतिबद्धता गरिएको छ ।

पोखरा-२२ रेडक्रस सोसाइटी उपशाखामा राजु बराल

पोखरा न्युज ।

पोखरा लेखनाथ महानगरपालिका वडा नं २२ नेपाल रेडक्रस सोसाइटी उपशाखाको सभापतिमा टेकनाथ बराल (राजु) चयन भएका छन्। उपशाखाको सम्पन्न १० औं अधिवेशनले बराल लाई सभापतिमा चयन गरेको हो।

उपशाखाको अन्य सदस्यहरुमा प्रकाश बराल, खडानन्द बराल, गितादेवी ढकाल, शान्ति बास्तोला, बिष्णुदेवी बराल, पुष्प पौडेल, निर्मला गुरुङ र प्रजापति बराल छन्। उपशाखाको पहिलो बैठकले पदाधिकारीहरुको चयन गर्ने सभापति टेकनाथ बराल (राजु)ले बताए। नेपाल रेडक्रस सोसाइटी कास्की शाखाका उपमन्त्री उर्मिला खड्काले  निर्वाचित सभापति लगायत सदस्यहरुलाई शपथ ग्रहण गराएकी थिइन्।

कार्यक्रमका प्रमूख अतिथि एवम् पोखरा लेखनाथ महानगरपालिका वडा नं २२ का वडा अध्यक्ष मातृकाप्रसाद बराल, कास्की शाखाका उपमन्त्री उर्मिला खड्का र स्थानीय रेडक्रसकर्मी रबीन्द्र बराल लगायतले शुभकामना मन्तव्य राखेका थिए।

उपशाखाका सभापति टेकनाथ बराल (राजु) को अध्यक्षतामा सम्पन्न भएको कार्यक्रममा उपसभापति गीतादेवी ढकालले स्वागत मन्तव्य र सचिव मातृकाप्रसाद बरालले कार्यक्रम सञ्चालन गरेका थिए।

रीताको बयान – बलात्कार गर्न खोजेपेछि इँटाले हानेँ

चाँगुनारायण नगरपालिकास्थित ब्रह्मायणी मन्दिर परिसरमा मृत भेटिएका व्यापारीकाे मृत्यु एक महिलाको इँटा प्रहारबाट भएको खुलेको छ ।

तर, इँटा हान्नुको कारण भने आत्मरक्षा देखिएको छ ।

स्थानीय माटो व्यवसायी ५५ वर्षीय सिताराम सैंजुको शव बुधबार बिहान मन्दिर परिसरमा भेटिएको थियो । हत्या भएको आशंकामा अनुसन्धान थालेको प्रहरीले रीता राई र मन्दिरका पाले ७० वर्षीय रामबाबु लामालाई पक्राउ गरेको छ ।

रीताले आफूलाई बलात्कार गर्न खोजेपछि प्रतिकारका क्रममा इँटाले हानेको बयान दिएकी छन् । महानगरीय प्रहरी परिसर भक्तपुरका प्रहरी प्रहरी नायब उपरीक्षक कृष्ण प्रसाईंका अनुसार सैंजुको मृत्यु इँटा प्रहारबाट भएको खुलेको छ ।

यस्तो थियो घटना

सैंजु अरु दिनमा झै मंगलबार साँझ पनि मदिरा पिएर ब्रह्मायणी मन्दिर पुगेका थिए । ओखलढुंगा घर भएकी ३० वर्षीय रीता राईलाई जिस्काए । आफूलाई जबरजस्ती गर्न खोजेपछि इँटाले टाउकोमा प्रहार गरेको रीताको बयान छ ।

यो दृश्य मन्दिरका पाले लामाले पनि देखेका रहेका छन् । तर, सैंजु गम्भीर घाइते भएको थाहा पाएनन् । ‘लामाले राति सैंजुको रगत पानीले पखालिदिएको समेत बयान दिएका छन्’, अनुसन्धानमा संलग्न एक प्रहरी अधिकारीले भने ।

स्रोत : अनलाइनखबर

लाटोकोसेरो संरक्षणका लागि जिरीमा उत्सव

दोलखा जिल्लाको जिरी नगरपालिकामा लाटोकोसेरो संरक्षणकालागि अन्तर्राष्ट्रिय उत्सवको तयारी गरिएको छ । विश्वमै दुर्लभ हुदै गएको पंछि लाटोकोसेरो तथा हुचीलको संरक्षणकालागि माघ १९ र २० गते जिरीमा दुई दिने संरक्षण उत्सव हुन लागेको हो ।

ब्यापार मेला, कृर्षि महोत्सव, नयाँ बर्षमा सडक महोत्सव भन्दा फरक धारको यस महोत्सवमा चोरी सिकारी, बासस्थानको विनास, कृर्षिमा बिषादीको अधिक प्रयोगको कारण संकटमा परेका लाटोकोसेरोको संरक्षणको विषयमा उत्सव हुने छ । मुसा खाएर अन्नको संरक्षणमा महत्वपूर्ण योगदान दिने लाटोकोसेरो संरक्षणकालागि उत्सवको आयोजना गरिएको लामो समय संरक्षण क्षेत्रमा काम गर्दै आएको संस्था प्रकृतिका साथीका निर्देशक राजु आचार्यले बताए ।

चोरी सिकारी, बासस्थानको विनास, कृर्षिमा बिषादीको अधिक प्रयोगको कारण संकटमा पर्दै गएको मांसहारी चरा लाटोकोसेरो तथा हुचीलको महत्वको बारेमा जानकारी दिदै संरक्षणमा लाग्न प्रोत्साहन गर्ने उद्देश्यले दुई दिने लाटोकोसेरो तथा हुचील उत्सवको तयारीमा संरक्षणकर्मीहरु जुटेका हुन् ।

मुसाहरुको संख्या नियन्त्रण गरेर किसानलाई सहयोग गर्ने भएकोले लाटोकोसेरो किसानको साथीको रुपमा परिचित छ । एक जोडी लाटोकोसेरो तथा हुचीलले एक सिजनमा तीन हजार सम्म मुसाहरु खाने गर्दछन् । मुसा बाहेक किरा फट्याङ्ग्रा, सर्प, भ्यागुता खाएर संख्या नियन्त्रण गरि किसानलाई लाटोकोसेरो तथा हुचीलले ठुलो गुन लगाउँछन् ।

धार्मिक रुपमा पनि लाटोकोसेरो देवी लक्ष्मीको वाहन मानिन्छ । पर्यावरणलाई सन्तुलन राख्न यिनीहरुले ठुलो भूमीका खेल्ने गर्दछन् । यसैले यती धेरै महत्वको पंछि चोरी सिकारी र वासस्थानको अभावको कारण संकटमा पर्दै गएकोले बिगत ७ बर्ष देखि उत्सवको रुपमा संरक्षण अभियान थालीएको आचार्यले बताए ।

बिश्वमा दुई सय २५ प्रजातीका लाटोकोसेरो पाइन्छ । तराई देखि हिमाल सम्म गरि नेपालमा २२ प्रजातीका लाटोकोसेरो पाइन्छ । चोरी सिकारी र बासस्थानको अभावको कारण नेपालमा ८ प्रजातीका लाटोकोसेरो तथा हुचील दुलभ हुदै गएको प्रकृतीका साथीका बन्य जन्तु अनुसन्धान निर्देशक यादव घिमीरेले बताए । बिश्वमा ९ हजार प्रजातीका चरा पाइन्छन । नेपालमा ८ सय ७६ प्रजातीका चरा पाइन्छ ।

उत्सवमा लाटोकोसेरो संरक्षणको साथै स्थानीय लोप हुदै गएको कला, संस्कृती र खेलको संरक्षणकालागि बिबिध कार्यक्रम समेत गरिने घिमीरेले बताए । बिद्यार्थीलाई लाटोकोसेकारेको महत्वको बारेमा जानकारी दिने उद्देश्यले हाजिर जवाफ, वादविवाद प्रतियोगिताको साथै बिभिन्न संरक्षणको कक्षा पनि संचालन गरिने उनले बताए । महोत्सवले चरा पर्यटनको रुपमा स्थानीय गाउँको पर्यटन प्रवद्धनमा पनि सघाउने उनले सुनाए ।

पोखरा-१३ आर्वामा मृत चितुवा फेला

पोखरा न्युज ।

पोखरा लेखनाथ महानगरपालिका वडा नं – १३ स्थित आर्वामा मृत अवस्थामा चितुवा फेला परेको छ ।

आर्वाको जंगलमा बिहिबार उक्त चितुवा मृत फेला परेको हो ।

बिहिबार दिउसो २ बजेतिर स्थानीयले जंगलमा मृत चितुवा देखेपछि प्रहरीलाई खबर गरेका थिए । खबर पाउन साथ वडा प्रहरी कार्यलय रामबजार कास्कीबाट खटिएका प्रहरीले त्यो मृत चितुवा जिल्ला बन कार्यालयलाई  बुझाएको छ ।

 

 

सिक्लेसले अबको पाँच दिनपछि नियमित विद्युत् उत्पादन गर्ने

कास्कीको मादी गाउँपालिकाको सिक्लेसमा निर्माण सम्पन्न सिक्लेस जलविद्युत् आयोजनाले अबको पाँच दिनपछि नियमित रुपमा विद्युत् उत्पादन गर्ने भएको छ ।

डेढ महिनादेखि परीक्षण उत्पादन गर्र्दै आएको उक्त आयोजनाको परीक्षण उत्पादन सफल भएकाले सोमबारदेखि नियमित विद्युत् उत्पादन गर्ने र विद्युत्लाई राष्ट्रिय प्रसारण लाइनमा जोडिने आयोजनाका प्रबन्ध निर्देशक किरण केसीले जानकारी दिए ।

केसी कन्स्ट्रक्सनको सिक्लेस हाइड्रोपावर कम्पनीले तीन वर्षअघिदेखि शुरु गरेको सो आयोजनाबाट १३ मेगावाट विद्युत् उत्पादन भइरहेको छ । कूल रु दुई अर्ब पाँच करोडको लागतमा उक्त आयोजना निर्माण गरिएको हो । सिक्लेस गाउँ नजिकैको मड्क्यू खोलामा बाँध बनाई जम्मा गरिएको पानीलाई तीन किलोमिटर लामो सुरुङमा दुईवटा ट्रर्वाइनबाट पानी तल झारी विद्युत् उत्पादन गरिएको छ । उत्पादित विद्युत् १३२ किमी केभी प्रसारण लाइनबाट लेखनाथस्थित बूढीबजारमा निर्माण भएको सवस्टेशनमा जोडिएको छ ।

रन अफ द रिभर प्रविधिमा बनेको सो आयोजनाले नेपाल विद्युत् प्राधिकरणसँग हिउँदको समयमा प्रति युनिट रु सात र वर्षायामको समयमा प्रतियुनिट रु चारमा विद्युत् खरिद बिक्री गर्ने सम्झौता गरेको निर्देशक केसीले बताए ।

तार व्यवस्थापन गर्दै कामपा

काठमाडौँ महानगरपालिकाले सडकमा रहेको जथाभावी तार व्यवथापनको काम तीव्र बनाएको छ ।

आज बिहान त्रिपुरेश्वर चोकबाट दुई गाडी अव्यवस्थित तार संकलन गरेको कामपा वातावरण व्यवस्थापन विभाग, कार्यसञ्चालन शाखाका प्रमुख नगर प्रहरी निरीक्षक मीनबहादुर थापाले जानकारी दिए ।

उनले भने “सार्वजनिक बिदाको दिन पनि काम गरेका छौँ काम गर्ने थोरै, बिगार्ने धेरै भएपछि सकारात्मक प्रभाव देखिँदैन त्यसका लागि सबै जिम्मेवार हुनुपरयो ।” संकलन गरिएको तरमध्ये सबैभन्दा बढी संकलित तारमा इन्टरनेट, केबल सेवा प्रदायकका तार र टेलिफोनका तार बढी छ । संकलित तार टेकुमा राखिएको छ ।

सुरक्षाको दृष्टिकोणले जोखिम बनेका भुईंमा लतारिएको तार, प्रयोग नगरिएका तारले थप समस्या निम्त्याउने भएकाले तिनको व्यवस्थापन गर्नु अत्यावश्यक भएको प्रमुख नगर प्रहरी निरीक्षक थापाले भने ।

धुलो संकलन गर्ने, गैरकानूनीरूपले फोहर फाल्नेलाई निगरानी गर्ने, सडक विस्तारका क्रममा छरपष्ट भएका तार बटुल्ने, अव्यवस्थित तार आफैँ काट्ने वा अन्य निकायले काटेका तार व्यवस्थापन गर्ने अहिलेको नियमित काम भएको उनले जानकारी दिए ।

सडक विस्तारका क्रममा हालसम्मा कामपाले ३० गाडी बराबरको तार व्यवस्थापन गरिसकेकोे र अब छिट्टै सबै स्थानका अव्यवस्थित तार संकलन गरिने बताइएको छ ।