पोखरा न्युज –
पोखरामा रहेका धादिङवासीहरुको साझा एवं छाता संस्था धादिङ–पोखरा सम्पर्क समाजको १४औं खुल्ला रक्तदान कार्यक्रममा ११८ युनिट रगत संकलन भएको छ ।
समाजले आफ्नो वार्षिकोत्सवको अवसरमा शनिबार पोखरामा रक्तदान कार्यक्रम आयोजना गरेको थियो । पहिलो रक्तदाता धादिङ त्रिपुरासुन्दरी गाउँपालिका वडा नं. ६ का रेशम सडौलालाई व्लडव्याग हस्तान्तरण गर्दै पोखरा लेखनाथ महानगरपालिकाकी उपप्रमुख मञ्जुदेवी गुरुङले कार्यक्रमको उद्घाटन गरेकी गरेकी थिइन ।
उक्त अवसर बोल्दै कार्यक्रमका प्रमुख अतिथि समेत रहेकी गुरङले धादिङ समाजको सामाजिक गतिविधि निकै प्रशंसायोग्य रहेको बताइन । उनले धादिङ समाज पोखरामा रहेका संघ–संस्थाहरुमध्ये उत्कृष्टमा गनिने भन्दै समाजले रचनात्मक काम गर्न योजना बनाएर आएमा महानगरपालिकाले सहयोग गर्ने प्रतिवद्धता जनाइन । उनले रक्तदान जत्तिको पुण्य मिल्ने काम मन्दिरमा गएर पूजा गर्दा पनि नमिल्ने भन्दै रक्तदान गरेर अस्पतालको शैयामा रहेका विरामीलाई पुनःजीवन दिन सबै नगरवासी आग्रसर बन्नुपर्नेमा जोड दिइन । महानगरका उपप्रमुख गुरुङले पोखरामा रहेका सामाजिक संघ–संस्थाहरुको नामावली र गतिविधि संकलन गरि नगरपालिका गर्न सक्ने सहकार्यका लागि मापदण्ड बनाएर अघि बढ्ने बताइन ।
नेपाल पत्रकार महासंघका केन्द्रीय सदस्य रुद्र भट्टले धादिङ समाजको सामाजिक कार्य जति प्रशंसा गरेपनि कम हुने भन्दै समाजको एकता र गतिविधिबाट सबैले पाठ सिक्नुपर्नेमा जोड दिए । समाजको रक्तदान कार्यक्रम समग्र पोखराकै लागि उत्कृष्ट र नमूना काम भएको भन्दै उनले यसले धादिङवासी तथा समाजको छविलाई नै उँचो बनाएको स्पष्ट पारे ।
समाजका पूर्व अध्यक्ष एवं सल्लाहकार परिषद सदस्य कृष्ण कुमार श्रेष्ठले धादिङवासीहरु एकता कायम गर्नका लागि रक्तदान कार्यक्रमले महत्वपूर्ण भूमिका निर्वाह गरेको बताए ।
सल्लाहकार एवं नेपाली कांग्रेस, धादिङ–पोखरा सम्पर्क सदनका सभापति केदार धमलाले धादिङवासी राजनीतिक आस्थाका आधारमा विभाजित हुने गरेको भएपनि सामाजिक कार्यमा सधैं एकतावद्ध हुने गरेको बताए ।
समाजका अध्यक्ष युवराज खतिवडाको अध्यक्षतामा भएको कार्यक्रममा स्वागत वरिष्ठ उपाध्यक्ष सुदर्शन बसौला, धन्यवाद ज्ञापन कार्यक्रम संयोजक सरस्वती श्रेष्ठ सरु र संचालन महासचिव हरि पन्तले गरेका थिए । क्षेत्रीय रक्तसंचार केन्द्र पोखराको प्राविधिक सहयोगमा कार्यक्रम सम्पन्न भएको थियो ।
उक्त अवसरमा कार्यक्रमलाई सफलतापूर्वक सम्पन्न गर्नका लागि उत्कृष्ट सहयोग पुरयाउने धादिङ–पोखरा सम्पर्क समाज सिद्धलेक गाउँपालिका इकाइ, विष्णु भण्डारी र कुमारी भण्डारीका साथै रेशम सडौलालाई सम्मान गरिएको थियो ।
