पोखरा न्यूज – ३० , असार ।
पोखरा लेखनाथ महानगरपालिका – ०८ सिर्जनाचोकबाट पौने ४ लाख नगद सहित ७ जना जुवाडे पक्राउ परेका छन् ।
सिर्जनाचोक स्थित मार्फा गेष्ट हाउस एण्ड थकाली भान्छा घरका कविन तुलाचनले जुवातास खेलाइरहेको अवस्थामा नगद रु ३ लाख ७५ हजार ४ सय २० सहित ७ जनालाई पक्राउ गरेको जिल्ला प्रहरी कार्यालय कास्कीले जनाएको छ । अबैध रुपमा जुवा तास खेलाइरहेको छ भन्ने गोप्य सुचनाको आधारमा सादा पोशाकमा खटिएको प्रहरी टोलीले ४ बुक तास र नगद सहित उनीहरुलाई पक्राउ गरेको जिल्ला प्रहरी कार्यालय कास्कीका प्रहरी प्रबक्ता डिएसपी रबिन्द्रमान गुरुङले जानकारी दिए ।
डिएसपी गुरुङका अनुसार पक्राउ पर्नेमा जुवा खेलाउने कविन तुलाचन सहित पोखरा लेखनाथ महानगरपालिका-९ महेन्द्रपुल बस्ने ५१ बर्षीय भुपेन्द्र हिराचन, पोखरा लेखनाथ महानगरपालिका -७ एयरर्पोर्ट बस्ने बर्ष ३७ बर्षीया महिला प्रेम कुमारी गुरुङ, पोखरा लेखनाथ महानगरपालिका -५ जिरो किमि बस्ने ४१ बर्षीय ठाकुर प्रसाद गुरुङ, रोल्पा थवाङ गाउँपालिका -५ का ४५ बर्षीय दिल बहादुर घर्ति, म्याग्दी अन्नपुर्ण गाउँपालिका -३ बस्ने ३५ बर्षीया महिला भिमा पुन तथा मुस्ताङ घरवाझोङ गाउँपालिका- ३ बस्ने ६० बर्षीय फनेल्द्र थकाली रहेका छन्
उनिहरुलाई नियन्त्रणमा लिई थप अनुसन्धान भइरहेको प्रहरीले जनाएको छ।
