पोखरा न्यूज-१६, भदौ ।
सहयात्री बचत तथा ऋण सहकारी संस्था पोखराका सेयर सदस्यले पोखरा न्युरोडमा रहेको युनाइटेड रेफरेन्स ल्याबोरेटरी प्रालि (युआरएल)मा ३० प्रतिशत छुट पाउने भएका छन् । गण्डकी प्रदेशकै पहिलो रेफरेन्स ल्याबमा हुने सबै खालका रक्त परीक्षणमा सहयात्रीका सदस्य छुट पाउने छन् । सम्झौतामा सहयात्रीका अध्यक्ष डा। त्रिभुवन शर्मा र युआरएलका प्रबन्ध निर्देशक ठाकुरप्रसाद पन्तले शनिबार हस्ताक्षर गरे ।
सहयात्रीको ८ औं वार्षिकोत्सवमा आयोजित कार्यक्रममा यो सम्झौता भएको हो । सहयात्रीका अधिकांश सेयर सदस्य कास्कीका रहेका निज विद्यालय सञ्चालक हुन् । सो अवसरमा भएको निशुल्क शिविरमा ३ सय ७ जनाको सित्तैमा मधुमेह तथा थाइराइडसम्बन्धी रक्त परीक्षण गरिएको थियो ।
साधारणसभामा गण्डकी प्रदेशका भूमि व्यवस्था, कृषि तथा सहकारी मन्त्रालयका सचिव सरदचन्द्र श्रेष्ठले सहकारीले उत्पादनमूलक क्षेत्र र कृषिमा लगानी बढाउनुपर्नेमा जोड दिए । यसबाट देशले चाहेको समृद्धि र जनताको जीवनस्तरमा परिवर्तन सम्भव हुने उनको भनाइ छ ।
कार्यक्रममा मधुमेह, थाइराइड तथा हर्मोन रोग विशेषज्ञ डा। तारा कोइरालाले पोखरामा नै सबैजसो रोगको उपचार र विज्ञ चिकित्सक उपलब्ध रहेको बताए । उनले भने, ‘खोकी लागे पनि राजधानी र विदेश जाने चलन हट्नुपर्छ । हामी पोखरालाई मेडिकल हब बनाउन लागेका छौं ।’ उनले विद्यालय सञ्चालक र शिक्षकहरुलाई आफ्नो देशलाई माया गर्ने पाठ सिकाउन आग्रह गरे । डा। कोइरालाले कार्यक्रममा मधुमेह र थाइराइड रोग लाग्नुका कारण, उपचार पद्धति र पूर्व सावधानीका उपायमाथि प्रकाश पारेका थिए ।
युआरएलका प्रबन्ध निर्देशक ठाकुरप्रसाद पन्तले सामाजिक संघ, संस्थासँगको सहकार्य र सामाजिक उत्तरदायित्व वहन नै आफूहरुको पहिचान बनेको बताए । उनले हालसम्म ५५ वटा निशुल्क शिविरमा करिब ३२ हजारले निशुल्क सेवा पाएको जानकारी दिए ।
कार्यक्रममा कोअपरेटेभि म्यानेजर्स क्लबका अध्यक्ष मिलन ढकाल र प्याब्सन कास्की अध्यक्ष दिनेश श्रेष्ठले पनि बोलेकोको सहकारीका प्रबन्धक पशुपति अधिकारीले जानकारी दिए ।
सहकारीका अध्यक्ष डा। त्रिभुवन शर्माको अध्यक्षतामा भएको कार्यक्रममा स्वागत उपाध्यक्ष चिनु रानाभाट र सञ्चालन सचिव डा। रामजी शर्माले गरेका थिए ।
