पोखरा न्यूज – १४, असोज ।
दसैं, तिहार, छठ जस्ता चाड पर्वलाई लक्षित गर्दै पोखरा मोबाइल टावरले फेस्टिबल अफर ल्याएको जनाएको छ ।
पोखराको महेन्द्रपुलमा रहेको टावरले भदौ १५ देखि शुरु भई कात्तिक महिनाभर कायम रहनेगरी अफर लागु गरेको जनाएको हो । पोखरा टावर प्रालिका अध्यक्ष सञ्चालक देव नारायण श्रेष्ठले उक्त अवधिमा टावरमा जुनसुकै सामान किन्दा पनि विशेष छुट दिइने बताए । ‘चाडपर्वको उमंगमा अझ रौनक थप्न स्किम ल्याएको उनले जानकारी दिए ।’
अफर अन्तर्गत हरेक दिन लक्की ड्रमार्फत १ जनालाई मोबाइल सेट र ३ जनालाई भित्ते घडी दिइनेछ । टावरमा सामान खरिद गर्दाका कुपनहरु समावेश गरी मंसिर ३ गते बम्पर उपहार खोलिने पोखरा टावर सञ्चालक समिति सचिव नारायण सुवेदीले जानकारी दिए । सुवेदीका अनुसार बम्पर पुरस्कार विजेताले स्कुटर पाउनेछन् ।
८० वटा मोबाइल पसल रहेको टावरको अन्डरग्राउन्डमा टावरका ग्राहकका लागि पर्याप्त र निशुल्क पार्किङको व्यवस्था छ । टावरमा कम्प्युटर, इलेक्ट्रोनिक्स, कर प्रशिक्षण केन्द्र, क्याफे, स्मार्ट सेलको आधिकारिक डिलर, मोवाइल पार्ट्सका समेत पसल छन् ।
५ तले आधुनिक भवनमा सबैजसो कम्पनीका मोबाइलका होलसेल तथा खुद्रा पसल छन् ।