Pokhara News
Image default

करको कारण पोखरामा भेडा च्याङग्राको मुल्य बृद्धि भएको व्यवसायीको भनाई

मुगु, डोल्पा र मुस्ताङका भेडा, च्याङग्रा पोखरामा

डिएनबी, पोखरा न्यूज- २७, असोज ।

करको कारणले यस बर्ष पोखरामा भेडा च्याङग्राको मुल्य बृद्धि भएको छ । व्यवसायीहरुले मुस्ताङ, म्याग्दी, वेनि हुदै पोखरा भित्राउदा प्रति भेडा च्याङग्राको करिब २ सयको हाराहारीमा कर तिरेको बताएका छन् । यससंगै पोखरा महानगरपालिकाले प्रति भेडा च्याङग्रा प्रति दिन १५ रुपैया कर संकलन गरिरहेको छ ।  ब्यबसायीहरुले भेडा च्याङग्रा पोखरा भित्राउदासम्म तिर्नुपरेको कर र प्रति दिन महानगरपालिकालाई तिर्नुपर्ने कर अग्रिम जोडेर भेडा च्याङग्राको मुल्य निर्धारण गरेको बताउछन्।

यस बर्ष कर धेरै लागेकोले गर्दा र मुस्ताङ ,मुगु, डोल्पा लगायतका क्षेत्रमै भेडा च्याङग्राको मुल्य केहि बृद्धि भएकोले गर्दा गत बर्षको तुलनामा प्रति भेडा च्याङग्रा २/३ हजारसम्म महङगो भएको भेडा च्याङग्रा व्यवसायी छेवेल लामाले पोखरा न्यूजलाई बताए । यस बर्ष उनले ३ सय वटा भेडा च्याङग्रा पोखरामा ल्याए पनि हालसम्म एक सय ५० भन्दा बढी बिक्रि हुन बाँकी रहेको बताए । १८ देखि २४ हजारसम्म मुस्ताङमा भेडा च्याङग्राको मुल्य परेको बताउदै लामाले पोखरामा आउदा सम्म विभिन्न ठाँउमा कर तिर्नुपर्ने कारणले गर्दा २५ देखि २९ हजारसम्म पोखरामा बिक्रि गरेको बताए । ‘हामीले अन्नपुर्ण गाउँपालिका, पोखरा महानगरपालिका, बनसमिति लगायतलाई कर तिर्नुपरेको छ जसको मार खरिद गर्ने व्यक्तिलाई हुने हो, हामीले त लागेको मूल्य जोड्नै पर्यो नि’ – उनले भने ।

पोखरा महानगरको नाममा ठेकेदार नविन आलेमगरले शनिबार याम्दिमा २ सय ७० वटा भेडा, च्याङ्ग्राबाट उठाएको एकदिनको करको रसिद

सुरेन्द्र गुरुङले यस बर्ष २ सय ६० वटा कालो जातको च्याङग्रा पोखरामा बिक्रिको लागि ल्याएका छन। २२ देखि २३ हजारमा मुस्ताङको बारगाँउ मुक्तिनाथ क्षेत्रबाट प्रति च्याङग्राको मुल्य परे पनि पोखरासम्म आउदा विभिन्न ठाँउमा कर तिर्दा प्रति च्याङग्रा २ सय रुपैया भन्दा बढी लागेको गुनासो गरे । उनले भने-  ‘महानगरले दिनको १५ रुपैया एउटा भेडा, च्याङग्राको उठाएको छ १०/१२ दिन सम्मको कर तिर्दा त्  महँगो हुन्छ  नि।’ गुरुङले याम्दीको खाली चौरमा च्याङग्रालाई चराउदै प्रति च्याङग्रा २४ देखि २७ हजारसम्म बिक्रि गर्न थालेका छन । च्याङग्रालाई व्यबस्थित गरी कुनै अस्थाई खोरमा राखेर बिक्रि गर्न खोज्दा प्रति खोर २५ हजारसम्म पर्ने गरेको उनले गुनासो गरे ।

दशैं पर्वलाई लक्षित गरी भेडा च्याङग्रा व्यापारिहरुले केहि दिन अघि देखि पोखरा क्षेत्रमा भेडा च्याङग्रा भित्राए पनि आज (शनिबार) देखि भेडा च्याङग्रा किन्नेहरुको पोखराको याम्दी क्षेत्रमा भिड भाड् लागेको छ ।

यस बर्ष पनि मुस्ताङबाट १६ हजार ५ सय भेडा च्याङग्रा मुस्ताङबाट बाहिरिएको भेटेनेरी अस्पताल तथा पशु सेवा विज्ञ केन्द्र म्याग्दी अन्र्तगत मुस्ताङ सम्पर्क शाखाका पशु चिकित्सक शिवलाल भुषालले बताए । नेपाल खाद्य संस्थानले यस बर्ष करिब एक हजर भेड च्याङग्रा काठमाण्डौं लगेको छ भने अन्य व्यपारिले करिब ५ हजार जसो काठमाण्डौं लगेको बताइन्छ ।

सप्तमीको अघिल्लो दिन सोमबार देखि पोखराको पुरानो टुडिखेलमा दशैं हाट मेला संचालन हुने भएको छ । उक्त हाट मेलामा भेडा च्याङग्रा, देखि दैनिक उपभोग्य बस्तु तथा दशेैं पर्वमा आवश्यक सामाग्रिहरु सहितको खरिद बिक्रि हुने भएको छ । राष्ट्रिय माविले विभिन्न व्यापारिसंग व्यवसायी शुल्क लिने भएको छ ।

हाल पुरानो टुडिखेलमा १५ वटा भेडा च्याङग्राको लागि खोर बनाइएको बिद्यालयका शिक्षक नारायण चापागाइले बताए ।

अन्य खबर

बागलुङ दरमखोलाको असला माछा विदेशमा कोशेली

रासस

अनुमानित २२ करोड डलर लागतको तल्लो सेतीको सम्भाव्यता अध्ययनका लागि प्रस्ताव माग

रासस

पोखरामा भेडा च्याङग्राको मुल्य ३० देखि ५० प्रतिशत सस्तियो