पोखरा न्यूज- १९, कार्तिक ।
आज कार्तिक कृष्ण त्रयोदशी, यमपञ्चकअर्थात् तिहारको पहिलो दिन । प्रत्येक वर्ष कार्तिक कृष्ण त्रयोदशीमा काग तिहार मनाइन्छ । आजको दिन कागलाई मीठा खानेकुरा दिएमा राम्रो समाचार लगिदिने धार्मिक विश्वास रहिआएको छ । कागलाई यमदूतका रुपमा मान्ने शास्त्रीय परम्परा छ ।
हिन्दूहरुको दोस्रो ठूलो चाड तिहारको पहिलो दिन काग तिहारको अवसरमा आज काग सम्मेलन गरिएको छ । राष्ट्रिय सङ्गीतकर्मी सङ्घले आयोजना गरेको काग सम्मेलनमा १७३ जीव जनावर तथा चराचुरुङ्गीको आवाज निकाल्ने इलामका रमेश दुलाल ‘कागे’ ले कागको स्वर निकालेर कागलाई एकै ठाउँमा भेला पारी रत्नपार्कमा करीब ३०० सङ्ख्यामा काग बोलाएर १५ औँ काग सम्मेलन गरे । दुलालले विगत १४ वर्षदेखि तिहारको अवसरमा काग तिहारको दिन काग सम्मेलन गर्दै आएका छन् ।
“मैले संविधान नबन्दा काग बोलाएर नयाँ बानेश्वरस्थित संसद् भवन र अन्तर्राष्ट्रिय विमानस्थल घेराउ गरेको छु, भारतले नेपालमा नाकाबन्दी गर्दा मैले भारतीय राजदूतावासको ढोका अगाडि काग बोलाएर विरोध गरेको छु”, दुलालले भने ।
दुलालले कागबाहेक मुखैले मादल, सनाइ, सारङ्गी, पियानो, ड्रम सेट, मुर्चुङ्गा, गितारको धुनसमेत निकाल्छन् । गाई, भैँसी र अन्य चराचुरुङ्गीको आवाज पनि दुरुस्तै सुनाउँदै आएको दुलालले बताए ।
