पोखरा न्यूज – १९, मंसिर ।
लेखनाथ महोत्सवको १५ औं संस्करण पुषको पहिलो सातादेखि हुने भएको छ । लेखनाथ उद्योग वाणिज्य संघको आयोजनामा विगत १५ वर्ष देखि कास्कीको लेखनाथमा हुँदै आएको लेखनाथ महोत्सवको १५ औं संस्करण आगामी पुषको ५ गते देखि १६ गतेसम्म हुने लेखनाथमा बुधबार आयोजित पत्रकार सम्मेलनमा जानकारी गराइएको हो ।
महोत्सवमा करीव ३ सय ५० स्टल रहने आयोजक लेखनाथ उद्योग वाणिज्य संघले जनाएको छ । हालसम्म ७५ प्रतिशत स्टल बुकिङ भइसकेको संघले बताएको छ । संघका अनुसार महोत्सवमा स्थानिय उत्पादन, कृषि प्रदर्शनी, शैक्षिक प्रदर्शनी, सूचना प्रविधि प्रदर्शनी, हस्तकला, मेसिनरी, कर्पोरेट, अटो, जनरल, फेन्सी, गार्मेन्ट, डेरी, खानालगायतको प्रदर्शनी गरिनेछ ।
त्यस्तै ख्याति प्राप्त कलाकारहरुको दोहोरी, पप कन्सर्ट, हास्य प्रहसन रहने आयोजक लेखनाथ उद्योग बाणिज्य संघका अध्यक्ष कृष्णहरि भण्डारीले जानकारी दिए । महोत्सवमा बाल उद्धान खाना महोत्सव र सुन्तला प्रदर्शनी विशेष आकर्षणको रुपमा रहने उनले बताए । समग्र गण्डकी प्रदेशको आर्थिक, समाजिक, कृषि र पर्यटनको विकासमा टेवा पुर्याउने उद्देश्यले महोत्सव आयोजना गरिएको संघका अध्यक्ष भण्डारीले बताए । महोत्सवको पनि महोत्सव बनाउने आफूहरुको लक्ष्य रहेको उनले बताए ।
त्यस्तै, महोत्सवको अवसरमा कवि शिरोमणी लेखनाथ पौड्यालको सम्मानमा देशव्यापी कविता प्रतियोगिता गरिने भएको छ भने लुकेको प्रतिभाको खोजी गर्ने उद्धेश्यले हरेक महोत्सवमा आयोजना हुँदै आएको गायन प्रतियोगिता ‘गण्डकी तारा’लाई यस वर्ष पनि निरन्तरता दिइने भएको छ । यसैगरी रत्यौली प्रतियोगिता पनि आयोजना गरिने जनाइएको छ ।
‘महोत्सव लेखनाथको संस्कृति, स्थानिय उत्पादन, विकास र समृद्धि’ भन्ने मूल नाराका साथ सुरु हने महोत्सव अबधिभर तीन लाख दर्शकले अवलोकन गर्ने आयोजकले दाबी गरेको छ । महोत्सवमा करीब १५ करोड बराबरको आर्थिक कारोवार हुने अपेक्षा गरिएको संघका अध्यक्ष कृष्णहरि भण्डारीले बताए । करीब ९० लाख खर्च हुने अनुमान गरिएको महोत्सवबाट १ करोड २५ लाख आम्दानी गरी ३५ लाख बचत गर्ने लक्ष्य राखिएको उनले बताए । महोत्सवबाट बचत हुने रकमले कृषि उपज खरिद विक्री केन्द्र निर्माण गर्ने, प्रदशनी स्थलको स्तरोन्नती र अन्य सामाजिक क्षेत्रमा खर्च गर्ने जनाइएको छ ।
महोत्सव प्रवेशका लागि ६० रुपैयाँ कायम गरिएको छ भने विद्यार्थीका लागि ४० रुपैयाँ टिकटदर तोकिएको छ । साँझ कन्सर्टका लागि भने १ सय रुपैयाँ प्रवेश शुल्क लाग्ने संघका महासचिव गोपीचन्द्र बास्तोलाले जानकारी दिए । बृद्धबृद्धा तथा अपाङ्गता भएकाहरुलाई भने निःशुल्क प्रवेश दिइने उनले बताए ।
