पोखरा न्यूज- २६, मंसिर ।
धार्मिक हिसाबले निकै महत्व बोकेको लमजुङ करपुटारमा यहि फागुन १६ गते देखि २१ गते सम्म मध्यनेपाल धार्मिक महोत्सव हुने भएको छ ।
करपुटार क्षेत्रलाइ मुख्य हव बनाएर धार्मिक नेपालको ऐतिहासिक , सांस्कृतिक, पुरातात्विक तथा पर्यटकीय महत्व बोकेको गण्डकी प्रदेशकै पवित्र तिर्थ स्थलको रुपमा रहेको इशानेश्वर महादेव मन्दिर परिसरमा महोत्सव गर्न लागीएको लमजुङ मध्य नेपाल नगरपालिका प्रमुख रमेश कुमार पाण्डेले जानकारी दिए ।
प्रचारको अभावले माथी उठन नसकेको यस क्षेत्रलाइ महोत्सवको माध्यमले कायापलट गराउन सकिने उनको भनाइ छ । महोत्सवमा बिभिन्न देश बिदेशबाट आएका धार्मिक गुरुको माध्यमबाट यस क्षेत्रको प्रचार हुने बताउदै उनले धार्मिक पर्यटन प्रवर्धन गर्ने ,पर्यटकीय गन्तव्यहरुको प्रचार प्रसार गरि दीर्घकालिन सोचका साथ मध्य नेपालको आर्थिक समृद्धिका जग निर्माण गर्ने लक्ष्य साथ अगाडी बढेको बताए ।
इशानेश्वर महादेवको मन्दिरलाइ देश बिदेशमा चिनाउने , पर्यटकिय गन्तव्यहरुलाइ प्रवर्धन गरि आर्थिक लाभ आर्जन गर्ने , प्राकृतिक सम्पदा र होमस्टेको बिकास गरि पर्यटनको बिकास गर्ने ,प्याराग्लाइडिङ र केबुलकार संचालन गर्ने जस्ता उदेश्यले महोत्सव गर्न लागिएको इशानेश्वर क्षेत्र बिकास समितिका अध्यक्ष रामचन्द्र घिमिरेले जानकारी दिए । उनले धार्मिक रुपले निकै महत्व बोकेको यस ठाँउमा हजारौ भक्तजनहरु आउने गरेको बताए ।
६ दिन सम्म चल्ने उक्त महोत्सवमा स्वदेश लगायत अन्य देशबाट एक लाख भन्दा बढि दर्शक भक्तजनले अवलोकन गर्ने, ३ करोड आम्दानी हुने ६० लाख खर्च लाग्ने अनुमान गरिएको आयोजकले जानकारी दिए । प्राचिनकालमा हरिनारायण पोख्रेलद्धारा बिउ राख्न खेत जोत्न लाग्दा शिव लिङ जोतिन गइ रगत बग्न थाल्यो र हल गो.रु सहित हलिको मृत्यु भएको र तेहि ठाँउमा शिव लिंगको उत्पत्ति भएको किवंदन्ती छ । सम्वत १४१४ मा तत्कालिन लमजुङका राजा वीरनारायण शाहद्धारा मन्दिर निर्माण गरि पुजा आर्चना गर्दै आएको भनिन्छ ।
गोरखाका राजा कृष्ण शाहको सन्तान नभए पछि महाशिवरात्रीका दिन मन्दिरमा आइ रातभर ठाडो बत्ति बाल्दा सन्तान प्राप्त गरेकोले सन्तान नहुनेले यहाँ ठाडो बत्ति बाल्ने प्रचलन छ । स्कन्द पुराणको स्वस्थानी व्रत कथामा माहेन्द्री नदिको तटमा सती देवीको दाहिने तिघ्रा पतन भएको र सो ठाँउमा तारकेश्वर महादेव उत्पत्ति भएको कुरा किवंदन्तीमा रहेकाले पनि यस मन्दिर धार्मिक हिसाबले निकै महत्व बोकेको मानिन्छ ।
