पोखरा न्यूज – २२, चैत । म्याग्दी मङ्गला गाउँपालिकाको बरञ्जा र अर्मनलाई सिधा सडक सञ्जालसँग जोड्न म्याग्दी नदीमा कुल २१ करोड ९६ लाख २५ हजार लागतमा दुई वटा मोटरेबल पुल निर्माण शुरु भएको छ ।
जसमध्ये फापरखेत–पखेरको १० करोड ७२ लाख र माटेबगर–मसानघाटको रु ११ करोड २४ लाख २५ हजारमा ठेक्का सम्झौता भएको छ । दुई वटै पुल बनाउन लुम्बिनी प्राकृतिक जेभीले ठेक्का लिएको छ ।
सडक डिभिजन कार्यालय बागलुङले मङ्गला गाउँपालिका–२ बाबियाचौरको माटेबगर र वडा नं ५ अर्मनको मसानघाट तथा बेनी नगरपालिका–४ फापरखेतदेखि मङ्गला गाउँपालिका–३ पखेर जोड्ने पक्की मोटरेबल पुल बनाउन लागेको हो । यो पुल बनेपछि जिल्लाको मुख्य बेनी–दरवाङ सडक हुँदै ठूलो भूगोल र बस्ती भएका बरञ्जा र अर्मन सिधा सडक सञ्जालमा जोडिने मङ्गला गाउँपालिकाका अध्यक्ष शतप्रसाद रोकाले बताए । यो पुल ४०/४० मिटरको डबल स्पाम भएको बन्नेछ ।
८० मिटर लम्बाइ र ११ मिटर चौडाइको पुल निर्माण गर्न लागिएको सडक डिभिजन कार्यालयका सूचना अधिकारी इञ्जिनीयर मकुन्दप्रसाद लामिछानेले जानकारी दिए । फापरखेत–पखेर जोड्ने पुलको लम्बाइ ११७ मिटर र चौडाइ ११ मिटर छ । यो पुलमा चार वटा पिल्लर हुनेछन् ।
२०७५ पुस २५ गते सम्झौता भएको दुवै पुल २०७७ साल पुस २५ मा सम्पन्न गर्ने लक्ष्य छ । पुल निर्माण भएपछि मङ्गला गाउँपालिकाको अर्मन, बरञ्जाका साथै बागलुङको ताराखोला गाउँपालिकाका बासिन्दालाई सुविधा पुग्ने मङ्गला–३ का वडाध्यक्ष कवीन्द्र रोकाले बताए । अर्मन र बरञ्जामा सडक निर्माण भए पनि मोटरेबल पुल नहुँदा स्थानीयवासी यातायात सुविधाबाट वञ्चित थिए ।
