पोखरा न्युज – १९, साउन । पोखरा स्वास्थ्य विज्ञान प्रतिष्ठानले अस्पतालमा सामाजिक सेवा इकाइ सञ्चालनको लागि गएको २३ असारमा सूचना निकाल्यो । सामाजिक क्षेत्रमा कार्यरत ४ गैरसरकारि संस्थाले इकाइ सञ्चालनका लागि निवदेन पेश गरे ।
असल छिमेकी सहयोग संघ नेपाल (गोनेसा), कोपिला नेपाल, टिम लिडर लोकल अर्गनाइजेसन (टोलि), कम्युनिटी सर्पोट ग्रुप हरु इकाइ सञ्चालनका लागि निवेदन पेश गर्ने संस्था थिए ।
कानुनअनुसार अस्पतालको सामाजिक सेवा इकाइ सञ्चालन संस्था छनौट गर्ने अधिकार अस्पताल निर्देशकको हुन्छ । तर, भिसीको संयोजकत्वमा बनेको टोलिले सामाजिक सेवा इकाइ सञ्चालनका लागि अन्र्तवार्ता बिना नै सिधै असल छिमेकी सहयोग संघ(गोनेसा)लाई इकाइ सञ्चालनका लागि नियुक्ती दिएको अस्पताल निकट स्रोतले जनाएको छ ।
गण्डकी प्रदेशकै ठुलो सरकारि अस्पतालमध्येको पश्चिमाञ्चल स्वास्थ्य विज्ञान प्रतिष्ठान यसै विषयलाई लिएर विवादमा तानिएको छ । अस्पतालमा दैनिक २ हजार हाराहारिमा बिरामी चेकजाँज गर्न आउँछन् । अस्पतालको यो विवाद अहिले अख्तियारसम्म पुगेको छ ।
अस्पताल निकट स्रोतका अनुसार अस्पताल व्यवस्थापन समितिलाई पछि पार्दै बनाइएको मूल्यांकन समितिका संयोजकमा डाक्टर नरेन्द्रबिक्रम गुरुङ, सदस्य सचिवमा निर्देशक अर्जुन आचार्य, लेखा प्रमुख ईन्द्र पौडेल, प्रशासन प्रमुख नारायण आचार्य र सामाजिक सेवा इकाइका प्रमुख भीम पौडेल छन् ।
स्रोतका अनुसार सूचना प्रकाशित हुनु अघि नै गोनेसासँगको सेटिङ मिली सकेको थियो । ‘गोनेसाको ठाउँमा अर्को संस्थालाई स्विकृति दिँदा अस्पताललाई १० लाखको ठाउँमा २० लाख आउँन सक्थ्यो,’ स्रोतको भनाई छ, ‘५०, ६० लाख नै पनि आउँन सक्थ्यो । तर, आर्थिक चलखेलको आधारमा गोनेसालाई स्विकृति दिइएको छ ।’
उजुरीको आधारमा अख्तियारले आइतबार अस्पतालमा अनुगमन पनि गरेको छ । अख्तियार कार्यालय पोखराका सूचना अधिकारी मेघनाथ रिजालका अनुसार अस्पतालका भिसी बुद्धिबहादुर थापा बिदामा रहेकाले आवश्यक कागजपत्र फेला परेको छैन । ‘भिसी काठमाडौं जानु भएको रहेछ,’ उनले भने, ‘कागजपत्र हामीले पाएनौं । उहाँ काठमाडौंबाट फर्किसकेपछि मात्रै कागज हात पर्छ ।’
यता असल छिमेकी सहयोग संघ नेपालका महासचिव राम सुवेदीले विवाद गर्नुपर्ने ठाउँ नै नरहेको बताउँछन् । ‘हामीले पाए पनि नपाए पनि केही हुने त होइन । उहाँहरुले आशय पत्र माग गर्नु भएको थियो,’ उनले भने, ‘हामी सहित ४ संस्थाको निवेदन पर्यो । त्यसमा हामी छानियौं । उत्कृष्ट हुने त एक जना मात्र होला नि !’ आफ्नो संस्थाको विषय मिलेका हुनाले मात्र आशय पत्र पेश गरेको उनले दाबी गरे ।
आफूँहरुको स्वार्थ भन्दा पनि राजनीति हाबी भएको उनको दाबी छ । ‘अरु केही होइन,’ उनले भने, ‘पोलिटिक्स मिसियो । त्यहाँ लिन जाने केही होइन । दिन जाने हो ।’ कार्यक्रम पाए पनि वार्षिक ६,७ लाख रुपैयाँ संस्थाको खर्च हुने उनले सुनाए । ‘त्यो पैसा कहाँबाट ल्याएर हाल्ने भनेर हामीलाई चिन्ता छ,’ उनले भने ।
बाहिर नचाहिने हल्ला फिजिएको भन्दै उनले आक्रोश पोखे । ‘उहाँहरुको पोलिटिक्स के हो थाहा भएन,’ उनले भने, ‘बढी नचाहिदो हल्ला भयो, हाम्रो संस्थासँग जोडेर हल्ला गर्नुपर्ने केही देख्दिन मैले ।’
गोनेसा बालबालिका, शिक्षा तथा स्वास्थ्य लगायतका क्षेत्रमा क्रियाशिल गैरसरकारि संस्था हो । २०५६ मा गोनेसाको स्थापना भएको हो ।
यस बिषयमा अस्पतालका भिसी बुद्धिबहादुर थापासंग सम्पर्क गरेर बुझ्दा गोनेसा पुरानो संस्था र एजेन्डा पनि अरु संस्थाको भन्दा राम्रो भएको हुनाले गोनेसालाई नै स्वीकृति दिएको जानकारी दिए । ‘आशय पत्र माग गर्दा गोनेसाको क्राइट एरिया अरुको भन्दा राम्रो थियो,’ उनले भने, ‘गोनेसा अरु भन्दा विश्वासिलो र पुरानो संस्था भएको हुनाले पनि उहाँहरुलाई स्किृति दिएका हौं ।’ सामाजिक सेवा इकाइ सञ्चालनमा कुनै पनि आर्थिक चलखेल नभएको समेत उनको दाबी छ । ।