दीननाथ बराल, पोखरा न्यूज – ११ मंसिर । पोखरामा नेकपाको चुनावीसभा स्थल नजिकै विष्फोट भएको छ ।
विष्फोटबाट २ गाडीमा सामान्य क्षति पुगेको छ । विष्फोटबाट ग १ ख ८८९१ नम्बरको यात्रुबाहक बस र ग १ ख ६७९४ नम्बरको माइक्रो बसमा क्षती पुगेको हो । विष्फोटमा भागदौड हुँदा केहि व्यक्ति घाइते भएको बताइएको छ ।
कास्की-२ को उपचुनावका लागि सत्तारुढ दल नेपाल कम्युनिस्ट पार्टी (नेकपा) ले पोखराको नयाँबजार स्थित प्रदर्शनीकेन्द्रमा चुनावीसभा गरिरहदा सभास्थलको २ सय मिटरको दुरीमा विष्फोट भएको हो । प्रदर्शनीस्थलमा रहेको डोमको उत्तर तर्फको भागमा पार्किङ गरेर राखेका बस नजिकै विष्फोट हुँदा गाडीका सिसाहरु फुटेका छन् ।
चुनावीसभालाई नेकपाका नेता सुबास नेम्वाङले सम्बोधन गरिरहदा विष्फोट भएको हो । नेकपा अध्यक्ष प्रचण्ड चुनावीसभा स्थलमा प्रवेश गरेको केहीबेरमै विष्फोट भएको बताइएको छ ।
विष्फोट कस्तो प्रकारको हो भन्ने बारेमा अनुसन्धान भैरहेको घटनास्थलमा रहेका सुरक्षाकर्मीले जनाएका छन् । विष्फोट लगतै सभास्थल र पोखरामा थप सुरक्षाकर्मीहरु खटाइएको छ ।नेकपाले कार्यकर्ता ओसार्न प्रयोग गरेको बसमा क्षति पुगेका बताइएको छ ।
यसअघि पोखरामा कात्तिक २१ गते पनि नेकपा उमेदवार बिद्या भट्टराईले उम्मेदवारी दर्ता गर्ने समयमा निर्वाचन कार्यालय नजिकै विष्फोट भएको थियो ।
त्यसैगरी पोखरामै सोमबार राति करिब २ बजे पोखरा – ३३ का वडा अध्यक्ष शिवप्रसाद आचार्यको गाडीमा बम बिष्फोट भएको थियो ।
यो पनि पढ्नुहोस् :-
पोखरामा चुनावीसभा स्थलमा भएको विष्फोटमा भागदौड हुँदा ५ घाइते
पोखरामा नेकपाको चुनावीसभा स्थलमा विष्फोट गराएको आशंकामा १ पक्राउ
