पोखरा न्यूज – २७, मंसिर । पोखराबाट दमौली तर्फ जाँदै गरेको कार दुर्घटना हुँदा ५ जना घाइते भएका छन् ।
पोखराबाट दमौली तर्फ जाँदै गरेको बा२च २८४७ नम्बरको कार शुक्रवार मध्यान्ह करिव १२ बजे तनहुँको म्याग्दे -२ जामुनेमा दुर्घटना हुँदा कारमा सवार ५ जना घाइते भएको प्रहरीले जनाएको छ ।
कार दुर्घटनामा सिन्धुपाल्चोक चौतारा -९ चिसापानीका २३ बर्षीय रोशन खड्का, भारत कानपुरका ३० बर्षीया नेहा जोशी, ६९ बर्षीया रेखा निरुला, ७० बर्षीया बिन्दा र ३१ बर्षीय बिना स्वर्णकार घाइते भएको गण्डकी प्रदेश प्रहरी कार्यालय पोखराले जनाएको छ। प्रहरीका अनुसार घाइतेहरुको रत्नहरि अस्पताल दमौलीमा उपचार भैरहेको छ ।
घाइतेहरु मध्ये खड्का, जोशी र निरुलाको अवस्था मध्यम रहेको र बाँकी २ जनाको अवस्था सामान्य रहेको प्रदेश प्रहरी कार्यालय पोखराका प्रहरी नायब उपरीक्षक राजेन्द्र बाबु रेग्मीले जानकारी दिए ।
कार आफै अनियन्त्रित भई सडक छेउमा रहेको रुखमा ठोकिन पुगेको प्रहरीले जनाएको छ । अनियन्त्रित कारलाई जोगाउन खोज्दा एक ट्रक समेत सडकमा पल्टिदा क्षती पुगेको प्रहरीले उल्लेख गरेको छ ।
घटनाको बारेमा अनुसन्धान भैरहेको प्रहरीले जनाएको छ ।