पोखरा न्यूज -०२, माघ । लमजुङको पुरनकोट होम स्टेमा पोखरा महोत्सवकै कारण आन्तरिक तथा बाह्य पर्यटकहरु भित्रिन थालेका छन । नवौ संस्करणको पोखरा महोत्सवमा आयोजक युनाईटेड क्लवले ग्रामीण पर्यटन प्रवर्द्धनका लागी होम स्टेलाई नि:शुल्क स्टलको व्यवस्था गरेपछि पुरनकोट होम स्टेमा यो वर्ष पर्यटकको संख्यामा वृद्धि आएको पुरनकोट होम स्टेका अध्यक्ष कन्या काशी गुरुङले बताइन ।
२०६८ सालदेख स्थापना भएको पुरनकोट होम स्टेको स्थापना भएको र २०७१ सालसम्म आन्तरिक तथा बाह्य पर्यटकको आकर्षकको रुपमा रहेतापनि पछिल्लो समय खस्किदै गएपछि नवौ संस्करणको महोत्सवमा पुरनकोट होमस्टेले स्लट पाएर प्रवर्द्धन गरेपछि यो वर्ष पुरनकोटमा ४ सय भन्दा बढी ग्रुपले होमस्टेमा बसोवास गरेको अध्यक्ष गुरुङले बताइन । पोखरा महोत्सवले सामाजिक कामसंगै पर्यटन प्रवर्द्धनका लागि दुर दराजमा रहेको गाँउको होम स्टेको प्रवर्द्धनमा लागेको र त्यसकै कारण लमजुङको पुरनकोटको प्रवर्द्धन हुनु आफैमा गर्वको कुरा रहेको गुरुङको भनाइ रहेको थियो ।
लमजुङको बेसीशहर नगरपालिका ४ डाँडागाँउमा रहेको पुरनकोट होमस्टेमा गुरुङ संस्कृति झल्कने घाटु, चुड्का, सोरठी संगै लमजुङे ठाडो भाकासंगै स्थानिय उत्पादन लोकल कुखुरा, खसीबोकासंगै कोदोको ढिडो गुन्द्रुकको अचारको स्वाद लिन सकिने गुरुङले बताइन । पोखरा महोत्सवमा स्टल राखेकै भरमा पछिल्लो समय आन्तरिक तथा बाह्य पर्यटकहरु पुरनकोट भित्रिन थालेको र पर्यटकहरु स्थानिय सांस्कृतिक प्रस्तुती संगै सिन्दुरे ढुंगा, पुरानो कोट , तारे भिरमा सञ्चालन हुने रक क्लाइम्बिङ मार्फत मनोरन्जन लिने गरेको होमस्टेका अध्यक्ष गुरुङले बताइन ।
दशौ संस्करणमा पनि पुरनकोट होम स्टेको स्टल पोखरा महोत्सवमा राख्न पाउदा पुरनकोटबासी खुशीसंगै उत्साहित छन । अघिल्लो पटक पोखरा महोत्सवमा स्टल राखेकै कारण ४ सय वटा ग्रुप होम स्टेमा बस्न पुगेका थिए ।
झरीका बीच सञ्चालित पोखरा महोत्सवको तेश्रो दिन झरीको प्रवाह नगरी दर्शकहरुले साथ दिएका छन । महोत्सवमा झरीका बीच छिरेका दर्शकले मनोरन्जन भन्दापनि जाडो मौसममा चाहिने सामाग्री किनमेल गर्नेको भीड बढ्यो । महोत्सवको तेस्रो दिन चर्चित लोकदोहोरी गायक कुलेन्द्र बिकको सालको पात भन्ने गीतमा दर्शकले भरपुर मनोरन्जन लिए । कुलेन्द्र संगै सरला पाण्डे, शंकर विरही गुरुङ, टेक क्षेत्री, रमा राना मगर, कमला गैरे लगायतको प्रस्तुती रहेको थियोभने सांझको पप कन्सर्ट तर्फ एम सी फ्लो र स्थानिय स्पर्श ब्याण्डको प्रस्तुती रहेको थियो ।
महोत्सवमा शुक्रबार लोक दोहोरी तर्फ प्रीति आले, प्रजापति पराजुली ,मञ्जु बिक, शिवहरी ढुंगाना, रामजी पौडेल, टेक क्षेत्री, सजना गुरुङ, पार्वती गुरुङ, इश्वर खड्का लगायतको प्रस्तुती रहने महोत्सव सांस्कृतीक उपसमिती संयोजक राजु श्रेष्ठले जानकारी दिए । सांझको पप कन्सर्टमा युवाहरुको ढुकढुकी आशिस राना लाहुरे संगै स्थानिय ब्ल्याक रोज व्याण्डको प्रस्तुती रहनेछभने सांस्कृतीक कार्यक्रम तर्फ नेवारी संस्कृती झल्कने तेर्सापट्टी तायामचा समितीको लाखेनाचको प्रस्तुती रहनेछ ।
महोत्सव जारी रहदा शुक्रबार देखि विद्यार्थी , अभिभावक र शिक्षकहरुलाई समेटेर निर्माण गरिएको कखरा डकुमेन्ट्री समेत प्रदर्शन गरिने महोत्सव प्रचार प्रसार संयोजक शान्त बहादुर थापाले जानकारी दिए । कखरा डकुमेन्ट्र पहिलो चरणमा १ बजे र दोश्रो चरणमा ३ बजे निशुल्क प्रदर्शनको व्यवस्था मिलाइएको आयोजकले जनाएको छ ।
