वासुदेव पौडेल, पोखरा न्युज – १९ चैत्र ।
पर्यटकीय रुपमा लामो समयदेखि राष्ट्रिय एवम् अन्तराष्ट्रिय रुपमा परिचित भएर पनि विकासका दृष्टिले ढारपाटन र आसपासका क्षेत्र ओझेलमा परिरहेको आज बुर्तिवाङमा आयोजित एक अन्तरक्रियामा जोड दिइएको छ ।
नेपाल एशोसिएसन अफ टुर्स एण्ड ट्राभल्स एजेन्टस् (नाट्टा) पश्चिमाञ्चल क्षेत्रीय संघको आयोजनामा हिजोदेखि सुरु चार दिने ढोरपाटन अवलोकन भ्रमण कार्यक्रम अन्तर्गत बुर्तिवाङको अन्तरक्रियामा शिकार आरक्षका रुपमा लामो समयदेखि परिचित यस क्षेत्रको विकास अपेक्षित रुपमा अघि नबढेको वक्ताहरूले जोड दिए ।
ढोरपाटन यस क्षेत्रको मात्र नभएर समग्र प्रदेश नं ४ र राष्ट्रकै महत्वपूर्ण पर्यटकीय गन्तव्यका रुपमा विकास हुने सम्भावनायुक्त स्थल भएको प्रतिनिधि सभा सदस्य डा. सूर्य पाठकले बताए ।
”सम्भावना भएर पनि ढोरपाटन र आसपासको अपेक्षित विकास हुन सकेको छैन,” उनले भने, “यहाँको विकासका लागि मन्त्रीपरिषद्बाटै निर्णय गरेर अधिकार सम्पन्न ढोरपाटन विकास समिति बनाउनु अपरिहार्य छ ।”
विकास समिति मार्फत एक वर्षमा गुरु योजना बनाएर अघि बढ्न सकियो भने यसले विकासमा फड्को मार्ने देखिन्छ ।
नाट्टा पश्चिमाञ्चल क्षेत्रीय संघका अध्यक्ष सन्तोष पोखरेलले पोखरा र ढोरपाटनलाई पर्यटकीय रुपमा एक आपसमा जोड्न सकिने बताउँदै यस क्षेत्रको विकासले समग्र प्रदेश नं ४ को पर्यटनमा टेवा पुग्ने धारणा राखे ।
ढोरपाटन र आसपासका क्षेत्रलाई पोखराको पर्यटनसँग जोड्ने उद्देश्यका साथ अवलोकन भ्रमण आयोजना गरिएको उनले बताए ।
ढोरपाटन नगरपालिकाका प्रमुख देबकुमार नेपालीले ऐतिहासिक ढोरपाटनमा कसरी अधिकतम पर्यटक पठाउन सकिन्छ भन्ने तर्फ सरोकारवाला सबैको ध्यान पुग्नु आवश्यक भएकोमा जोड दिए ।
उनले पोखरासँग ढोरपाटनबीच पर्यटकीय साझेदारीको खाँचो औल्याउँलै सञ्चालनमा आउन नसकेको ढोरपाटन विमानस्थल सञ्चालनमा ल्याउनुपर्ने उल्लेख गरे ।
पोखरा पर्यटन परिषद्का अध्यक्ष केदारनाथ शर्माले सन् १९८७ देखि सञ्चालनमा आएको ढोरपाटन सिकार आरक्ष र आसपासको क्षेत्र अझै पनि पर्यटकीय रुपमा अपेक्षित विकास हुन नसकेको अवस्थामा सरोकारवाला सबैको ध्यान पुग्नु जरुरी भएको बताए।
प्रचार प्रसारका साथै सबैको प्रयास भएमा समग्र प्रदेश नं ४ लाई नेपालकै नमूना प्रदेका रुपमा स्थापना गर्न सकिने उनले बताए ।
प्रदेश सभा सदस्य टेकबहादुर घर्तीले ढोरपाटनलाई पत्रपत्रिकामा मात्र सिमिति नगरेर यसको कसरी विकास गर्न सकिन्छ त्यस तर्फ ध्यान दिनुपर्ने बताए।
प्रदेश सभा सदस्य चन्द्रबहादुर बुढाले ढोरपाटन लगायत प्रदेश भित्रका सबै पर्यटकीय सम्भावनालाई उजागर गर्ने गरी अघि बढ्नुपर्नेमा जोड दिए ।
नाट्टा पश्चिमाञ्चल क्षेत्रीय संघका महासचिव हरिराम अधिकारीले ढोरपाटनलाई पोखराको पर्यटनसँग जोड्नुका साथै यसको प्रचारप्रसार लगायतका उद्देश्य राख्दै अवलोकन भ्रमण आयोजना गरिएको स्पष्ट पारे।
कार्यक्रम संयोजक कुल चन्द्र शर्माले अध्ययन भ्रमणका क्रममा ढोरपाटन सहित यस आसपासका पर्यटकीय स्थलको पनि प्रवद्र्धनात्मक भ्रमण गरिने जानकारी दिए।
