पोखरा न्युज- २३, जेठ ।
पोखरामा ठुलो आवाज निकाली तथा मोडिफाई गरि चलाइएका १७ वटा मोटरसाइकललाई कास्की प्रहरीले नियन्त्रणमा लिएको छ l
पोखरा महानगर क्षेत्रका बिभिन्न स्थानमा स्विप अपरेशन तथा सादा पोशाकमा प्रहरी परिचालन गरी उक्त मोटरसाइकलहरु नियन्त्रणमा लिएको जिल्ला प्रहरी कार्यालय कास्कीले जनाएको छ l बुलेट ५ वटा, VR ५ वटा, क्रसफायर ३ वटा , २२० पल्सर ३ वटा र डेस्ट्रार १ वटा गरि १७ वटा मोटरसाइकल नियन्त्रणमा लिइएको कास्की प्रहरी प्रमुख एसपी ओम बहादुर रानाले जानकारी दिए । एसपी रानाका अनुसार नियन्त्रणमा लिइएका मोटरसाइकलका चालकहरुलाई सवारी नियम उल्लघन उपर कारबाही गरिएको छ ।
दैनिक जनगुनासो आएपछि नगर क्षेत्रमा आफै फिल्डमा खटिई प्रहरी चेकिङलाई चुस्त-दुरुस्त बनाउन निर्देशन दिदै ठुलो आवाज निकाल्ने तथा स्वरुप परिवर्तन गरी चलाउने मोटरसाईकललाई नियन्त्रणमा लिई कारबाही गरेको एसपी रानाले बताए ।