सडक महोत्सबमा एक गम्भीर घाइते, मोटरसाइकल र स्कुटर गायब, स्टेजमा ढुंगामुडा प्रहरी पनि घाइते

महोत्सवमा शतप्रतिशत होटल बुकिङ नभएको व्यवसायीको गुनासो

डीएनबी, पोखरा न्यूज – १७, पुष

पोखरामा जारी सडक महोत्सबमा सोमबार राती एक युवा  गम्भीर  घाइते भएका छन् । लेकसाइड गौरीघाट स्थित महोत्सवस्थलको सडकमा  अपरिचित व्यक्तिको प्रहारबाट पोखरा-१५ नयाँगाउँका विकास नेपाली घाइते भएका हुन् ।

प्रतक्ष्यदर्शीका अनुसार  करिब १०:३०  बजेको समयमा आफ्ना साथीसंग डिड्दै गर्दा अचानक कसैको प्रहारबाट घाईते हुन पुगेका नेपाली छटपटाउदै स्थानीय एक होटलको अगाडी पुगेर  ढलेका थिए ।

देब्रे खुट्टाको तिघ्रामा काटेर घाइते भएका नेपालीलाई सडक अवरुद्धको कारण एम्बुलेन्स घटनास्थलमा पुग्न नसकेपछि स्थानिय र सुरक्षाकर्मीको सहयोगले तन्नामा राखेर एम्बुलेन्स रहेको स्थान १० मिटर पर  लगिएको थियो । पोखराको नमस्ते हस्पिटलमा पुर्याइएका उनको अहिले  पोखरा स्वास्थ्य बिज्ञान प्रतिष्ठान ( पश्चिमान्चल क्षेत्रीय अस्पताल) मा उपचार भइरहेको छ  ।घटनास्थलमा अत्याधिक मात्रामा बगेको रगतलाई स्थानीय होटलले पखालेका थिए ।

घटनामा संलग्न व्यक्तिहरु र घटनाको बारेमा थप अनुसन्धान भइरहेको वडा प्रहरी कार्यालय बैदामका प्रहरी नायव उपरिक्षक नविन कार्कीले बताएका छन्  । उनले पोखरा न्यूज संग कुरा गर्दै घटनास्थलमा फुटेको बियरको बोतल समेत देखिएको भन्दै बोतलले कसैले हान्यो वा अन्य कुनै कारणले घटना भयो भन्नेबारे अनुसन्धान भइरहेको बताए ।

Loading...

स्टेजमै ढुंगा मुडा प्रहार, ३६ जना पक्राउ,  ४ जनालाई सार्वजनिक मुद्धा

महोत्सवस्थलको ३ किलेमिटर क्षेत्रभित्र अनावश्यक हो हल्ला तथा झैँझगडा गर्ने ३६ जना पक्राउ  परेको डिएसपी कार्कीले बताएका छन्  । डिएसपी कार्कीक अनुसार पक्राउ परेका मध्ये ४ जनालाई सार्वजनिक मुद्धा दर्ता गरिएको छ । छोरेपाटनका १७ बर्षीय दीप गुरुङ, १८ बर्षीय अनमोल गुरुङ तथा  १९ बर्षीय पुकार गुरुङ र पोखरा ६ बैदामका १९ बर्षीय विवेक नेपालीलाई र सार्वजनिक मुद्धा चलाइएको  हो ।

पक्राउ परेका मध्ये पुकार गुरुङले  कलाकार समिर घिसिंग ( भिटेन) ले साँगीतिक  कार्यक्रम प्रस्तुत गरिरहेका बेला  महोत्सवको स्टेजमै ढुंगामुडा प्रहार गरेको डिएसपी कार्कीले जनाए । कार्कीका अनुसार पुकारको  ढुंगा मुडाबाट एकजना  प्रहरी जवान घाइते भएका छन् ।

महोत्सब स्थलबाट मोटरसाकल तथा स्कुटर गायब

नयाँ बर्षको स्वागतको लागी दर्शक मेलामा रमाइरहेको बेला महोत्सव स्थलबाट मोटरसाइकल तथा स्कुटर गायब भएका छन् । लेखनाथका रिलिज पुनको ग १६ प २९२९ नम्बरको पल्सर मोटरसाइकल डिहीकोपाटनबाट हराएको छ । उनले बेलुका ७:३० बजे डिहीकोपाटनमा ह्यान्डल  लक् गरेर राखेको मोटरसाइकल १ बजे फर्किदा नभेटेको जनाए । उनले मोटरसाइकल हराएपछि बैदाम प्रहरीमा गएर उजुरी गरेको बताए । डिहीकोपाटनबाटै प्रकाश नाम गरेका व्यक्तिको रातो र कालो पल्सर समेत हराएको बताइएको छ । त्यसैगरी राष्ट्रबैंक चोक नजिकबाट २२० सिसिको सेतो कालो पल्सर समेत हराएको भनि अर्का एक व्यक्तिले आफु संगै बैदाममा उजुरी टिपाएको पुनले बताए ।

यसबारेमा बैदामका डिएसपी कार्कीलाई सोध्दा आफुहरुले महोत्सब स्थलको पार्कबाट एउटा स्कुटर मात्र हराएको भन्ने थाहा पाएको बताए  ।

महोत्सवमा शतप्रतिशत होटल बुकिङ नभएको व्यवसायीको गुनासो

पोखराका पर्यटकीय स्तरिय होटलमा अगेंजी नयाँ बर्षको अवसरमा शतप्रतिशत अकुपेन्सि यस बर्ष हुन नसकेको पश्चिमाञ्चल होटल संघका निवर्तमान अध्यक्ष भरतराज पराजुलीले बताए । पोखराका केहि होटलहरुको अकुपेन्सि फुल भए पनि अधिकांश होटल अकुपन्सि करिब ८० देखि ९० प्रतिशत जसो रहेको उनले जनाए ।

उनले भने “ रेवानका केही सार्थीहरुले होटलको रुममा मुल्य बृद्धि हुन्छ भनि दिएको अभिव्यत्तिबाट होटलमा प्रभाव परेको हो । ” यस अघिका सडक महोत्सवमा पर्यटकहरुले रुम पाउन मुस्किल पर्थयो । सडक महोत्सवको अवसरमा पोखराको ३ किलोमिटर क्षेत्र बाहेक नजिकका होटल तथा रेष्टुरेण्ट सहितका अन्य व्यवसायीहरुको व्यापार बढेको छ ।

रेवान पोखराका अध्यक्ष भिमसेन भुजेलले यस बर्ष महोत्सवमा आतासवाजी गर्न नपाएकोमा दुर्घाग्य भएको जनाए । आफ्नै केहि साथीहरुले वोलिमा विचार नगर्दा महोत्सवमा आफुहरुले आशातित व्यापार गर्न नसकेको गुनासो गरे ।  यस बर्षको महोत्सवमा दर्शक अत्याधिक भए पनि होटल, रेण्टुरेण्ट सहितको समग्र व्यापारमा भने प्रभाव परेको उनले जनाए । रेवान पोखराका पुर्व अध्यक्ष सुर्य बहादुर भुजेलले सडक महोत्सवको अवसरमा होटलको रुममा ५० प्रतिशतसम्म मुल्य बृद्धि हुने बताएका थिए । यसको प्रभावले एकातर्फ केहि व्यावसायीलाई मार परेको छ ।

पोखराका केहि होटल तथा रेष्टुरेण्टहरुमा अगेंजी नयाँ बर्ष र सडक महोत्सवको असरमा चर्को मुल्य अशुल्ने गरेको पर्यटकहरुले गुनासो गर्न थालेका छन। रेवान पोखराले कोमागाने पार्क क्षेत्रमा विभिन्न सांगीतीक कार्यक्रम राखे पनि उक्त क्षेत्रमा संचालन भएका केही रेष्टुरेण्टले भने मुल्य सुचिको वोर्ड राखेर मुल्य उल्लेख नै नगरेको भेटिएको थियो ।

पुष १३ देखि सुरु भएको सडक महोत्सव मंगलबार बेलुका सकिदैछ ।

Loading...

प्रतिक्रिया

तपाईको इमेल गोप्य रहनेछ / प्रतिक्रिया लेखेर नाम र इमेल भर्नुहोस् *

Close