मुस्ताङको जोमसोम–लोमान्थाङ सडकखण्ड सञ्चालनमा

पोखरा न्यूज – २९, चैत । मुस्ताङको जोमसोम–लोमान्थाङ सडकखण्ड करीब चार महीनापछि सञ्चालनमा आएको छ ।

जोमसोमदेखि कागबेनी छुसाङ हुँदै उपल्लो मुस्ताङको लोघेकर दामोदरकुण्ड र लोमान्थाङ गाउँपालिका जोड्ने सडकमा गत पुसदेखि हिउँ जमेर यातायात सेवा अवरुद्ध भएको थियो ।

सडक सुचारु भएपछि चिसो छल्न बेँसी झरेका उपल्लो मुस्ताङका बासिन्दा घर फर्कन थालेका छन् । सो सडक खुलेपछि लोमान्थाङ, दामोदरकुण्ड, कोरला क्षेत्रको भ्रमणमा जाने पर्यटकलाई सहज भएको छ । बाक्लो हिउँ जमेको समर–भेना खण्डमा एक्साभेटर परिचालन गरेर हिउँ पन्छाइ खुलाइएको लोघेकर दामोदरकुण्ड गाउँपालिकाका अध्यक्ष राजु विष्टले जानकारी दिए ।

यसवर्ष फागुनको अन्तिम सातासम्म बाक्लो हिमपात भएको थियो । लोमान्थाङ, लोघेयकर दामोदरकुण्ड गाउँपालिका र उपल्लो मुस्ताङ जीप व्यवसायी समितिको पहलमा सडक खुलाइएको यातायात व्यवसायी देव गुरुङले बताए । उनका अनुसार उपल्लो मुस्ताङमा ३० भन्दा बढी गाडीले यातायात सेवा दिइरहेका छन् ।

सडक खुलेसँगै केही दिनयता म्याग्दीको बेनी हुँदै सडक मार्ग भएर मुस्ताङ भ्रमणमा जाने पर्यटक र तीर्थयात्रीको चाप बढेको छ । देशका विभिन्न ठाउँ र विदेशबाट आएका पर्यटक तथा तीर्थयात्रीको बेनी–जोमसोम सडकमा चाप बढेको जिल्ला ट्राफिक प्रहरी कार्यालय म्याग्दीका प्रमुख बैकुण्ठ पौडेलले बताए ।

© Copyright 2019, All Rights Reserved | Pokhara News | नोट : यस पोखरा न्यूज डटकममा सम्प्रेषित कुनै पनि समाचार वा समाचारको अंश हाम्रो अनुमति विना साभार गरेको पाइएमा हामी प्रेस काउन्सिल ऐन अन्तर्गत कारबाहीको प्रक्रियामा जान बाध्य हुने छौ ।
Loading...

प्रतिक्रिया

तपाइको इमेल गोप्य राखिनेछ । अनिवार्य भर्नुपर्ने ठाउँ *

Back to top button
Close